අමෙරිකානු ජනාධිපති ඩොනල්ඩ් ට්රම්ප් වෙත කොංග්රස් මණ්ඩලය සතු යුද බලතල පවරා දීම සම්බන්ධයෙන් ඩිමොක්රටික් සහ රිපබ්ලිකන් යන පක්ෂ දෙකම “නිවට” (Feckless) ලෙස කටයුතු කර ඇති බව ප්රමුඛ පෙළේ ඩිමොක්රටික් සෙනෙට් සභිකයෙකු වන කොරි බුකර් (Cory Booker) මහතා දැඩි ලෙස විවේචනය කරයි. ඉරිදා දින CNN පුවත් සේවයේ “State of the Union” වැඩසටහනට එක්වෙමින් ඔහු කියා සිටියේ, කොංග්රසය මෙලෙස නිහඬව සිටීම හරහා කියුබාව සහ උතුරු කොරියාව වැනි රටවලට ඒකපාර්ශ්විකව ප්රහාර එල්ල කිරීමට ජනාධිපතිවරයා දිරිමත් විය හැකි බවයි.
පෙබරවාරි 28 වැනිදා ඉරානයේ උත්තරීතර නායක අයතුල්ලා අලි කමේනි ඝාතනය කරමින් අමෙරිකාව සහ ඊශ්රායලය ආරම්භ කළ යුද්ධය, ඇෆ්ගනිස්ථාන යුද්ධයෙන් පසු අමෙරිකාව සම්බන්ධ වූ විශාලතම හමුදා මැදිහත්වීම බව බුකර් මහතා පෙන්වා දුන්නේය. පසුගිය නත්තල් සමයේ සිට ට්රම්ප් විසින් නයිජීරියාව, වෙනිසියුලාව සහ ඉරානය වෙත එල්ල කරන ලද ප්රහාර මෙන්ම ග්රීන්ලන්තය බලහත්කාරයෙන් අත්පත් කර ගැනීමට කරන තර්ජනයන් ද හිටපු ජනාධිපතිවරුන්ගේ ක්රියාවන්ට වඩා හාත්පසින්ම වෙනස් සහ භයානක තත්ත්වයක් බව ඔහු අවධාරණය කළේය.
මෙම ගැටුම්කාරී වාතාවරණය හේතුවෙන් ලෝක වෙළඳාමට අතිශය තීරණාත්මක හෝමූස් සමුද්ර සන්ධිය සති දෙකක කාලයක් වසා තබා ඇති අතර, එය ඉතිහාසයේ තෙල් වෙළඳපොළට එල්ල වූ දරුණුතම බලපෑම බව ද සෙනෙට් සභිකයා සඳහන් කළේය. මේ වන විට අමෙරිකානු සෙබළුන් 13 දෙනෙකු මියගොස් ඇති අතර, බදු ගෙවන ජනතාවගේ මුදල් බිලියන ගණනින් මෙම දැවැන්ත යුද මෙහෙයුම් සඳහා වැය වෙමින් පවතින බව ඔහු පෙන්වා දුන්නේය. කොංග්රසය මෙලෙස සිය වගකීම් පැහැර හැරීම මඟින් ජනාධිපතිවරයාට ඕනෑම රටකට එරෙහිව යුද්ධ ප්රකාශ කිරීමට අවසර දීමක් සිදුවන බවත්, මෙය ප්රජාතන්ත්රවාදයට බරපතල තර්ජනයක් බවත් ඔහු වැඩිදුරටත් පැවසීය.
