මැදපෙරදිග කලාපයේ උද්ගතව ඇති යුධමය තත්ත්වය හමුවේ ලෝක බලශක්ති සැපයුම් ජාල බිඳවැටීමෙන් ඇති විය හැකි බලපෑම් අවම කරගැනීම පිළිබඳව ජනාධිපති අනුර කුමාර දිසානායක මහතාගේ ප්රධානත්වයෙන් අද (19) පෙරවරුවේ ජනාධිපති කාර්යාලයේදී විශේෂ සාකච්ඡාවක් පැවැත්විණි. ඉදිරි මාස කිහිපය තුළ ලෝක ඉන්ධන වෙළඳපොළේ ඇති විය හැකි මිල ඉහළ යාම් සහ සැපයුම් අඩාල වීම් පිළිබඳව මෙහිදී දීර්ඝ වශයෙන් කරුණු විශ්ලේෂණය කෙරුණු අතර, විශේෂයෙන්ම 2025 වසරේදී ශ්රී ලංකාව ලබාගත් ආර්ථික ජයග්රහණ තිරසාරව ඉදිරියට ගෙන යාම සඳහා බලශක්ති සැපයුම අඛණ්ඩව පවත්වාගෙන යාමේ වැදගත්කම ජනාධිපතිවරයා මෙහිදී පෙන්වා දුන්නේය. ජාත්යන්තර මිල ඉහළ යාම් හමුවේ දේශීය ආර්ථිකයේ හැකිලීමක් සිදු නොවන පරිදි මිල කළමනාකරණය කිරීමටත්, පාරිභෝගිකයාට සහන සැලසීම සඳහා සහනාධාර ක්රමවේද ක්රියාත්මක කිරීමේ හැකියාව සොයා බලන ලෙසත් ජනාධිපතිවරයා නිලධාරීන්ට උපදෙස් ලබා දුන්නේය.
මෙම තීරණාත්මක සාකච්ඡාව සඳහා විදේශ කටයුතු, විදේශ රැකියා සහ සංචාරක අමාත්ය විජිත හේරත්, බලශක්ති අමාත්ය කුමාර ජයකොඩි, මහ බැංකු අධිපති ආචාර්ය පී. නන්දලාල් වීරසිංහ සහ මුදල් අමාත්යාංශයේ ලේකම් ආචාර්ය හර්ෂණ සූරියප්පෙරුම යන මහත්වරුන් එක්ව සිටියහ. එමෙන්ම ජනාධිපති ජ්යෙෂ්ඨ ආර්ථික උපදේශක දුමින්ද හුලංගමුව සහ ජනාධිපති කාර්ය මණ්ඩල ප්රධානී ප්රභාත් චන්ද්රකීර්ති යන මහත්වරුන් ඇතුළු පිරිසක් ද මෙයට සහභාගී වූහ. ලෝක වෙළඳපොළේ තෙල් මිල ඉහළ යාම මෙරට උද්ධමනයට බලපෑම් කළ හැකි බැවින්, පවතින විදේශ විනිමය සංචිත නිසි ලෙස කළමනාකරණය කරගනිමින් ඉන්ධන ආනයනය අඛණ්ඩව පවත්වාගෙන යාමට අවශ්ය මූල්ය උපායමාර්ග පිළිබඳව ද මෙහිදී විශේෂ අවධානයක් යොමු විය.
