ලෝක වෙළෙඳපොළේ ගල් අඟුරු ඇතුළු බලශක්ති ප්රභවයන්ගේ මිල ඉහළ ගියද, මෙරට ජනතාවට අඛණ්ඩව විදුලි සැපයුම ලබාදීම රජයේ මූලික අරමුණ බව සෞඛ්ය සහ ජනමාධ්ය අමාත්ය නලින්ද ජයතිස්ස මහතා අවධාරණය කරයි. අද (20) රජයේ ප්රවෘත්ති දෙපාර්තමේන්තුවේ පැවති විශේෂ මාධ්ය හමුවකදී අදහස් දක්වමින් අමාත්යවරයා පැවසුවේ පවතින අභියෝගාත්මක තත්ත්වය හමුවේ වුවද විදුලි කප්පාදුවකින් තොරව සේවාව පවත්වාගෙන යාමට අවශ්ය සියලු පියවර ගන්නා බවයි.
ගෝලීය වශයෙන් සියලු භාණ්ඩවල මිල ඉහළ යාම හමුවේ, විශේෂයෙන්ම ඉන්ධන සහ ගල් අඟුරු සඳහා වන ටෙන්ඩර් මිල ගණන් ද වත්මන් වෙළෙඳපොළ තත්ත්වයට අනුව තීරණය කිරීමට සිදුවන බව අමාත්යවරයා පෙන්වා දුන්නේය. සාමාන්ය කාලසීමාවන්හි පවතින මිල ගණන්වලට වඩා මෙම හදිසි අවස්ථාවන්හිදී මිල ගණන් වෙනස් විය හැකි බව ඔහු සඳහන් කළේය.
එසේම, ගල් අඟුරු වල ගුණාත්මකභාවය සම්බන්ධයෙන් ලැබී ඇති ඇතැම් වාර්තා පිළිබඳව දැනටමත් විමර්ශන ආරම්භ කර ඇති බවත්, එම පරීක්ෂණ වාර්තාවලින් අනතුරුව අවශ්ය ඉදිරි පියවර ගන්නා බවත් අමාත්යවරයා මෙහිදී පැවසීය. මාසයෙන් මාසයට විදුලි පරිභෝජනයේ පවතින විචල්යතාවයන් කළමනාකරණය කරමින්, එළඹෙන උත්සව සමයේදී ජනතාවට බාධාවකින් තොරව විදුලිය සැපයීම රජයේ ප්රමුඛතම අපේක්ෂාව බව ද ඔහු වැඩිදුරටත් කියා සිටියේය.
