ඉන්ධන මිල ඉහළ දැමීමට රජය ගත් තීරණය හේතුවෙන් අනෙකුත් සියලුම අත්යවශ්ය භාණ්ඩ හා සේවා මිල ගණන් ද ඉහළ යනු ඇති බව සමගි ජන බලවේගයේ පාර්ලිමේන්තු මන්ත්රී එස්.එම්. මරික්කාර් මහතා අද (22) ප්රකාශ කළේය. කොළඹදී පැවති මාධ්ය හමුවකට එක්වෙමින් ඔහු පෙන්වා දුන්නේ ප්රවාහන පිරිවැය ඉහළ යාම මත සහල් මිල ඉහළ යන අතරම, ධීවර යාත්රාවලට අවශ්ය ඉන්ධන මිල ඉහළ යාම හේතුවෙන් මාළු මිල ද ශීඝ්රයෙන් ඉහළ යනු ඇති බවයි.
මැදපෙරදිග පවතින යුධමය වාතාවරණය හමුවේ ලෝක වෙළෙඳපොළේ තෙල් මිල ඉහළ යාම පාලනය කිරීමට රජය අසමත් වී ඇති බවත්, මෙවැනි තීරණ හරහා ජනතාව රජය කෙරෙහි තැබූ අපේක්ෂාවන් බිඳ වැටී ඇති බවත් මන්ත්රීවරයා වැඩිදුරටත් සඳහන් කළේය. පවතින උද්ධමනය හමුවේ සාමාන්ය ජනතාවට සිය දෛනික අවශ්යතා සපුරා ගැනීම ඉදිරියේදී බරපතල අභියෝගයක් වනු ඇති බව ඔහු අවධාරණය කළේය.
