පාකිස්ථානයේ ඉස්ලාමාබාද් නුවර ප්රධාන රජයේ රෝහල්වල පවතින දැඩි වෙන්ටිලේටර් හිඟය හේතුවෙන් දැඩි සත්කාර ඒකක සියල්ලම පාහේ උපරිම ධාරිතාවයෙන් ක්රියාත්මක වන බව එරට ජනමාධ්ය වාර්තා කරයි.
මෙම අර්බුදය දැඩි ලෙස කැපී පෙනුනේ පාකිස්ථාන වෛද්ය විද්යා ආයතනයේදී (PIMS) ජ්යෙෂ්ඨ මාධ්යවේදී අබිඩ් රාසා කස්මි මහතා අවාසනාවන්ත ලෙස මියයාමත් සමඟය. අංශභාග තත්ත්වයකට ගොදුරු වූ ඔහුට ජීවිත ආධාරක සපයන ලෙස වෛද්යවරුන් නිර්දේශ කළද, ඒ වනවිටත් දැඩි සත්කාර ඒකකයේ තිබූ වෙන්ටිලේටර් 12ම රෝගීන්ගෙන් පිරී පැවතීම නිසා ඔහුට එම ප්රතිකාර ලබාගැනීමට නොහැකි වී තිබේ.
රෝහලේ වෛද්ය, ශල්ය සහ ළමා දැඩි සත්කාර ඒකකවල වෙන්ටිලේටර් 90 කට අධික සංඛ්යාවක් තිබුණද, ස්නායු හා පෙනහළු රෝගීන්ට දිගු කාලයක් ඒවා භාවිත කිරීමට සිදුවීම හේතුවෙන් නව අසාධ්ය රෝගීන් සඳහා ඉඩකඩ නොමැති වී ඇතැයි PIMS රෝහලේ විධායක අධ්යක්ෂ වෛද්ය රානා ඉම්රාන් සිකන්දර් පවසයි. රෝහලේ ඇඳන් 1,400 ම නිරන්තරයෙන් පිරී පැවතීම නිසා, දැඩි සත්කාර ඒකකවල ඉඩ ලැබෙන තෙක් අසාධ්ය රෝගීන්ට ට්රොලි මත තබා ප්රතිකාර කිරීමට වෛද්යවරුන්ට සිදුව තිබේ.
