අස්වැසුම සුබසාධක ප්රතිලාභ වැඩසටහනේ දෙවන අදියර යටතේ සුදුසුකම් ලැබූ ප්රතිලාභී නාමලේඛනය අද (27) ප්රකාශයට පත් කර ඇති අතර, ඒ සම්බන්ධයෙන් වන අභියාචනා සහ විරෝධතා භාර ගැනීම ආරම්භ කළ බව සුබසාධක ප්රතිලාභ මණ්ඩලය නිවේදනය කරයි. මෙම නාමලේඛන දිවයින පුරා පිහිටි සියලුම ප්රාදේශීය ලේකම් කාර්යාලවල ප්රදර්ශනය කර ඇති බැවින් මහජනතාවට ඒවා පරීක්ෂා කළ හැකිය.
යම් පුද්ගලයෙකුට තම නම ඇතුළත් නොවීම පිළිබඳව අභියාචනයක් හෝ සුදුසුකම් නොමැති අයෙකු නාමලේඛනයේ සිටී නම් ඒ පිළිබඳ විරෝධතාවක් ඉදිරිපත් කිරීමට ක්රමවේද කිහිපයක් හඳුන්වා දී ඇත. ඒ අනුව eservices.gov.lk වෙබ් අඩවිය ඔස්සේ මාර්ගගතව (Online) හෝ ප්රාදේශීය ලේකම් කාර්යාලයේ සුබසාධක ඒකකයේ සහාය ඇතිව අදාළ ඉල්ලීම් ඉදිරිපත් කළ හැකිය. මීට අමතරව, www.wbb.gov.lk වෙබ් අඩවියෙන් බාගත කළ හෝ ප්රාදේශීය ලේකම් කාර්යාලයෙන් ලබාගත් අයදුම්පත් සම්පූර්ණ කර භාර දීමේ හැකියාව ද පවතී.
මෙහිදී විශේෂයෙන් සැලකිය යුතු කරුණක් වන්නේ එක් පුද්ගලයෙකුට ඉදිරිපත් කළ හැක්කේ එක් අභියාචනයක් පමණක් වීමයි. නුසුදුසු පුද්ගලයන් සම්බන්ධයෙන් විරෝධතා ඉදිරිපත් කිරීමේදී ඒවා නිර්නාමිකව වුවද ඉදිරිපත් කළ හැකි බව මණ්ඩලය පවසයි. සියලුම අභියාචනා සහ විරෝධතා ඉදිරිපත් කිරීම සඳහා ලබා දී ඇති අවසන් දිනය වන්නේ 2026 අප්රේල් මස 10 වනදායි.
