ඉන්දියාවේ අන්ද්රා ප්රදේශයේ මාර්කපුරම් (Markapuram) දිස්ත්රික්කයේ රායවරම් (Rayavaram) ගම්මානය අසලදී අද (2026 මාර්තු 26) උදෑසන 6:00 ත් 6:30 ත් අතර කාලයේදී ඉතා දරුණු රිය අනතුරක් සිදුවිය. තෙලන්ගානා ප්රාන්තයේ නිර්මාල් සිට නෙල්ලෝර් දක්වා ධාවනය වෙමින් තිබූ ‘හරික්රිෂ්ණා ට්රැවල්ස්’ (Harikrishna Travels) ආයතනයට අයත් පෞද්ගලික මගී ප්රවාහන බස් රථයක් සහ අධික වේගයෙන් පැමිණි ටිපර් රථයක් මුහුණට මුහුණ ගැටීමෙන් මෙම අනතුර සිදුව ඇති බව පොලිසිය තහවුරු කරයි. ගැටීමත් සමඟ වාහන දෙකම ක්ෂණිකව ගිනිගෙන ඇති අතර ඒ හේතුවෙන් බස් රථය තුළ සිටි මගීන් 13 දෙනෙකු බරපතල ලෙස පිළිස්සීමෙන් එම ස්ථානයේදීම ජීවිතක්ෂයට පත්ව තිබේ.
මූලික පොලිස් පරීක්ෂණවලට අනුව අනතුර සිදුවූ ස්ථානය පටු වංගුවක් සහිත ප්රදේශයක් වන අතර ටිපර් රථයේ පැවති අධික වේගය පාලනය කර ගැනීමට නොහැකි වීම නිසා බස් රථයේ ගැටී ඇති බව වාර්තා වේ. තුවාල ලැබූ තවත් මගීන් පිරිසක් මාර්කපුරම් ප්රදේශයේ රෝහල් වෙත ඇතුළත් කර ඇති අතර ඔවුන්ගෙන් කිහිපදෙනෙකුගේ තත්ත්වය බරපතල බව රෝහල් ආරංචි මාර්ග පවසයි. මේ වන විට එම ස්ථානයට පැමිණ සිටින ජ්යෙෂ්ඨ පොලිස් නිලධාරීන් කණ්ඩායමක් වැඩිදුර විමර්ශන පවත්වන අතර මියගිය පුද්ගලයින්ගේ සිරුරු හඳුනා ගැනීම සඳහා විශේෂ පරීක්ෂණ සිදු කිරීමට නියමිතය.
අන්ද්රා ප්රදේශ් මහ ඇමති කාර්යාලය නිවේදනයක් නිකුත් කරමින් මෙම අවාසනාවන්ත සිදුවීම පිළිබඳව සිය බලවත් ශෝකය පළ කර ඇති අතර විපතට පත්වූවන්ට අවශ්ය සියලු සහන කඩිනමින් සලසන ලෙස බලධාරීන්ට උපදෙස් දී තිබේ. මීට අමතරව දිල්ලි නුවර කරෝල් බාග් ප්රදේශයේදී ද බස් රථයක් පෙරළීමෙන් පුද්ගලයින් දෙදෙනෙකු මියගොස් තවත් 23 දෙනෙකු තුවාල ලැබීමේ පුවතක් ද අද වාර්තා විය. මාර්කපුරම් අනතුර හේතුවෙන් එම මාර්ගයේ ගමනාගමන කටයුතු තාවකාලිකව අත්හිටුවා ඇති අතර ගින්න මැඩපැවැත්වීමෙන් පසු විනාශ වූ වාහන ඉවත් කිරීමට පියවර ගෙන ඇත.
