අස්වැසුම සුබසාධක ප්රතිලාභ වැඩසටහනේ පළමු අදියර සඳහා අයදුම් කළ සියලු දෙනාගේ තොරතුරු යථාවත් කිරීමේ විශේෂ සංගණන කටයුතු මේ දිනවල දිවයින පුරා ක්රියාත්මක වන බව සුබසාධක ප්රතිලාභ මණ්ඩලය නිවේදනය කරයි. සුබසාධක ප්රතිලාභ පනතට අනුව වාර්ෂිකව නාමලේඛන යාවත්කාලීන කිරීම අනිවාර්ය වන අතර මේ වන විට පුද්ගලයින් ලක්ෂ 29කට අධික සංඛ්යාවක් සිය තොරතුරු ඉදිරිපත් කර තිබේ. මෙම සංගණන ක්රියාවලිය එළඹෙන මාර්තු 28 වැනිදායින් අවසන් වීමට නියමිතය.
අදාළ වසම භාර සංගණන නිලධාරියා නිවෙස් වෙත පැමිණි අවස්ථාවේදී පවුලේ සාමාජිකයන්ගේ ජාතික හැඳුනුම්පත්, පසුගිය මාස තුනක විදුලි බිල්පත්, ඉඩම් ඔප්පු, වාහන හිමිකම් බලපත්ර සහ වෛද්ය සහතික ඇතුළු අවශ්ය ලිපි ලේඛන ඉදිරිපත් කිරීමට සූදානම්ව තබා ගන්නා ලෙස මණ්ඩලය ජනතාවගෙන් ඉල්ලා සිටියි. වැඩිහිටි, ආබාධිත සහ වකුගඩු දීමනා අපේක්ෂිත අයදුම්කරුවන්ගේ තොරතුරු ද මෙහිදී ආවරණය කෙරේ.
යම් හෙයකින් මෙම සංගණනයේදී අසත්ය තොරතුරු ලබා දෙන්නේ නම් එය සුබසාධක පනත යටතේ දඬුවම් ලැබිය හැකි වරදක් බව ද මණ්ඩලය අවධාරණය කරයි. එවැනි වරදක් සම්බන්ධයෙන් මහේස්ත්රාත්වරයෙකු ඉදිරියේ වරදකරු වන අයෙකුට රුපියල් 5,000ක දඩයක්, වසරක සිර දඬුවමක් හෝ එම දඬුවම් දෙකම නියම කිරීමට නීතිමය ප්රතිපාදන පවතින බව එම නිවේදනයේ වැඩිදුරටත් සඳහන් වේ.
