මැදපෙරදිග පවතින යුදමය වාතාවරණය හේතුවෙන් හටගෙන ඇති උග්ර බලශක්ති අර්බුදයට පිළියමක් ලෙස බංග්ලාදේශයේ සියලුම රජයේ සහ පෞද්ගලික විශ්වවිද්යාල අද (09) සිට වසා දැමීමට එරට රජය තීරණය කර තිබේ. එළඹෙන ඉදුල් ෆිතර් (Eid al-Fitr) උත්සව නිවාඩුව මෙසේ කලින් ලබා දීමට පියවර ගෙන ඇත්තේ විදුලිය සහ ඉන්ධන පාරිභෝගනය සීමා කිරීමේ හදිසි පියවරක් වශයෙනි. බංග්ලාදේශ අධ්යාපන අමාත්යාංශය පවසන පරිදි, විශ්වවිද්යාල නේවාසිකාගාර, පන්ති කාමර සහ රසායනාගාර සඳහා වැයවන විශාල විදුලි ධාරිතාව ඉතිරි කර ගැනීම මෙන්ම මාර්ග තදබදය අවම කිරීම හරහා සිදුවන ඉන්ධන නාස්තිය වැළැක්වීම මෙම තීරණයේ ප්රධාන අරමුණයි. තම බලශක්ති අවශ්යතාවයෙන් 95%ක්ම ආනයන මත යැපෙන බංග්ලාදේශය, ඇමරිකා-ඉරාන යුද්ධය හේතුවෙන් ගෝලීය වෙළඳපොළේ ඉන්ධන මිල ඉහළ යාම සහ සැපයුම් අඩාල වීම නිසා මේ වන විට දැඩි පීඩනයකට ලක්ව සිටී.
මේ වන විටත් එරට පාසල් රමසාන් උත්සවය වෙනුවෙන් වසා දමා ඇති අතර, නව නියෝගයත් සමඟ උපකාරක පන්ති සහ ජාත්යන්තර පාසල්වල කටයුතු ද අත්හිටුවීමට උපදෙස් දී ඇත. පවතින ගෑස් හිඟය හමුවේ එරට රජයේ පොහොර කර්මාන්තශාලා 5න් 4කම වැඩකටයුතු නතර කර ඇති අතර, එම ගෑස් තොග විදුලි උත්පාදනය සඳහා යොමු කර තිබේ. විදුලි කප්පාදුවකින් තොරව අත්යවශ්ය සේවා පවත්වාගෙන යාමට බංග්ලාදේශ රජය මෙවැනි දැඩි අරපිරිමැසුම් ක්රියාමාර්ග ගනිමින් සිටින බව විදෙස් වාර්තා වැඩිදුරටත් සඳහන් කරයි.
