තලංගම, අකුරේගොඩ ප්රදේශයේදී නීතීඥවරයෙකු සහ ඔහුගේ බිරිඳ ඝාතනය කිරීමේ සිද්ධියට අදාළ සැකකරුවන් වෙනුවෙන් ශ්රී ලංකා නීතීඥ සංගමය ලෙස කටයුතු කරන ආකාරය පිළිබඳව ඉදිරියේදී තීරණයක් ගන්නා බවත්, එම සංගමය සැමවිටම අගතියට පත්වූ පාර්ශ්වය වෙනුවෙන් පෙනී සිටින බවත් එහි සභාපති රජීව් අමරසූරිය මහතා ප්රකාශ කරයි. ඊයේ (14) පැවැති විශේෂ ප්රවෘත්ති සාකච්ඡාවකදී ඔහු මේ බව සඳහන් කළේ, අදාළ ඝාතනය සම්බන්ධයෙන් මාධ්යවේදීන් නැඟූ ප්රශ්න කිහිපයකට පිළිතුරු ලබා දෙමිනි. ඇතැම් පුද්ගලයන් අපරාධකරුවන් බව දැන දැනම ඔවුන් වෙනුවෙන් පෙනී සිටීම නීතීඥවරුන්ට මෙම සිද්ධිය මගින් පාඩමක් උගන්වන්නේදැයි මාධ්යවේදියෙකු විමසූ අවස්ථාවේදී සභාපතිවරයා අවධාරණය කළේ ලෝකයේ ඕනෑම රටක සැකකරුවෙකු වෙනුවෙන් නීතීඥ සහය ලැබීමේ අයිතියක් පවතින බවයි. ඕනෑම සැකකරුවෙකු අධිකරණය මගින් තීන්දුවක් ලබා දෙන තෙක් වැරදිකරුවෙකු නොවන බවත්, මෙවැනි අපරාධයක් සිදුවූ විට නීතිය ක්රියාත්මක කිරීමේ පූර්ණ බලය රජයට සහ පොලිසියට පවතින බවත් ඔහු මෙහිදී පෙන්වා දුන්නේය.
ඝාතනයට ලක්වූ නීතීඥවරයා මීට පෙර පාතාල කල්ලි නායකයෙකු වන “කරන්දෙණිය සුද්දාගේ” නඩු කටයුතු වෙනුවෙන් පෙනී සිට පසුව ඔහුගේ ප්රතිවාදියා වන “ලොකු පැටී” නැමැත්තාගේ නඩු සඳහා පෙනී සිටීම නිසා ඇති වූ වෛරයක් මත මෙම ඝාතනය සිදුව ඇති බවට පළවන වාර්තා පිළිබඳව ද මාධ්යවේදීන් මෙහිදී ප්රශ්න කළහ. ඊට දැඩි පිළිතුරක් ලබා දෙමින් සභාපතිවරයා කියා සිටියේ විවිධ පාර්ශ්වයන් පවසන පදනම් විරහිත කරුණු මාධ්ය මගින් ප්රසිද්ධ කිරීම සම්පූර්ණයෙන්ම සදාචාර විරෝධී බවයි. මෙම ඝාතනයේ පසුබිම් කතාව හෝ ඊට හේතු වූ කරුණු පිළිබඳව අවසන් නිගමනයකට පැමිණිය හැක්කේ අධිකරණයට මිස සමාජ මාධ්ය හෝ මාධ්ය නාලිකාවලට නොවන බව රජීව් අමරසූරිය මහතා වැඩිදුරටත් අවධාරණය කළේය.
