ප්රධාන දෙපාර්තමේන්තු දෙකක් ඉලක්ක කර ගනිමින් එල්ල වූ සයිබර් ප්රහාරයකදී සොරාගන්නා ලද දැවැන්ත දත්ත තොගයක් කප්පම්කරුවන් විසින් අන්තර්ජාලයට මුදා හැරීමත් සමඟ, එහි බලපෑම සහ පරිමාණය තක්සේරු කිරීම සඳහා බර්ලින් ප්රාන්ත රජය විසින් දැඩි අවධානයෙන් යුතුව පුළුල් විමර්ශනයක් ආරම්භ කර තිබේ.
ලබන සැප්තැම්බර් 20 වන දිනට නියමිත ප්රාන්ත මැතිවරණයට මාසයකටත් අඩු කාලයක් තිබියදී බර්ලින් නගරයේ පරිගණක ජාලය වෙත මෙම සයිබර් ප්රහාරය එල්ල වී ඇත. රයිසිඩා (Rhysida) නම් කප්පම්කාරී කණ්ඩායම විසින් ටෙරාබයිට් 5.79 ක දත්ත ප්රමාණයක් බිට්කොයින් 30 ක (ඇමෙරිකානු ඩොලර් 77,622 කට ආසන්න) ආරම්භක මිලකට වෙන්දේසි කිරීමෙන් අනතුරුව, සිකුරාදා දින මෙම දත්ත ප්රසිද්ධියට පත් කරනු ලැබීය. කෙසේ වෙතත්, තමන් කිසිදු විටෙක කප්පම් ඉල්ලීම්වලට යටත් නොවන බව බර්ලින් බලධාරීන් ප්රකාශ කර තිබුණි.
මෙම ලීක් වූ දත්ත සමාලෝචනය කිරීම, සත්යාපනය කිරීම සහ තක්සේරු කිරීම මෙන්ම බලපෑමට ලක් වූ පුරවැසියන්ට සහ ව්යාපාරිකයන්ට සහයෝගය දැක්වීම සඳහා විශේෂ මධ්යම අර්බුද ඒකකයක් (crisis unit) පත් කර ඇති බව ප්රාන්ත රජය සඳහන් කරයි. මෙම සයිබර් ප්රහාරය “අතිශයින් බරපතල අපරාධයක්” සහ රාජ්යයටම එල්ල වූ ප්රහාරයක් ලෙස හඳුන්වා දී ඇති බර්ලින් බලධාරීන්, සමාජ මාධ්ය ඔස්සේ තහවුරු නොකළ තොරතුරු පතළ නොකරන ලෙස ජනතාවගෙන් ඉල්ලා සිටී. ජර්මන් සහ යුරෝපා දත්ත ආරක්ෂණ නීතිවලට අනුකූලව, මෙම දත්ත කාන්දු වීම නිසා බලපෑමට ලක් වූ පුද්ගලයන් වෙත අදාළ බලධාරීන් විසින් ඉදිරියේදී දැනුම් දීමට නියමිතය.
