2026 මාර්තු 02 වන සඳුදා ප්රසිද්ධියට පත් කරන ලද වීඩියෝ සාක්ෂියකට අනුව, ඇමෙරිකානු හිටපු ජනාධිපති බිල් ක්ලින්ටන් විසින් ජෙෆ්රි එප්ස්ටයින් සහ ඩොනල්ඩ් ට්රම්ප් අතර පැවති සබඳතාව පිළිබඳව කරුණු අනාවරණය කර තිබේ. මෙම සාක්ෂිය ලබා දී ඇත්තේ නියෝජිත මන්ත්රී මණ්ඩලයේ විමර්ශන කමිටුවක් හමුවේය.
2002 හෝ 2003 වසරේ පැවති ගොල්ෆ් තරඟාවලියකදී ඩොනල්ඩ් ට්රම්ප් තමා සමඟ කළ කතාබහක් බිල් ක්ලින්ටන් මෙහිදී සිහිපත් කර ඇත. එහිදී ට්රම්ප් පවසා ඇත්තේ “අපි කාලයක් තිස්සේ හොඳින් කාලය ගත කළා, නමුත් නිශ්චල දේපල ගනුදෙනුවක් නිසා අපේ යාළුකම නැති වුණා” යනුවෙනි. එප්ස්ටයින්ගේ ගුවන් යානයෙන් ක්ලින්ටන් ගමන් කර ඇති බව ද ට්රම්ප් දැන සිටි බව මෙහිදී සඳහන් වේ.
හිටපු භාණ්ඩාගාර ලේකම් ලැරී සමර්ස් හරහා එප්ස්ටයින්ව තමාට හඳුන්වා දුන් බව ක්ලින්ටන් පවසා ඇත. පින්කම් සහ පුණ්ය කටයුතු සඳහා ආධාර ලබාගත හැකි අයෙකු ලෙස ඔහු හඳුන්වා දී තිබුණි. ඒ අනුව ආසියාව, අප්රිකාව සහ යුරෝපයේ සංචාර සඳහා එප්ස්ටයින්ගේ පෞද්ගලික ජෙට් යානය භාවිතා කළ ද 2003 වසරෙන් පසු එම ඇසුර නතර කළ බව ක්ලින්ටන් අවධාරණය කළේය.
තමා කිසිදු දිනක එප්ස්ටයින්ට අයත් පෞද්ගලික දූපතට ගොස් නොමැති බවත්, තම ජනාධිපති ධුර කාලය තුළ එප්ස්ටයින් 17 වතාවක් ධවල මන්දිරයට පැමිණ ඇති බව තමා දැන නොසිටි බවත් ඔහු මෙහිදී පැවසීය. එසේම එප්ස්ටයින් හරහා හඳුනාගත් කිසිදු පුද්ගලයෙකු සමඟ ලිංගික සබඳතා පැවැත්වූ බවට එල්ල වන චෝදනා ද ඔහු තරයේ ප්රතික්ෂේප කළේය.
ක්ලින්ටන් හෝ ට්රම්ප් යන දෙදෙනාටම එප්ස්ටයින්ගේ අපරාධ සම්බන්ධයෙන් මේ දක්වා නිල වශයෙන් චෝදනා එල්ල වී නොමැත. එප්ස්ටයින් 2019 වසරේදී ලිංගික ජාවාරම් චෝදනා මත අත්අඩංගුවේ පසුවෙද්දී බන්ධනාගාරය තුළ මියගිය අතර එය සියදිවි හානිකර ගැනීමක් බව බලධාරීන් නිගමනය කර ඇත.
