රුසියානු පාර්ලිමේන්තුවේ සභානායක මෙන්ම එරට පාලක “United Russia” පක්ෂ කණ්ඩායමේ නායක ව්ලැඩිමීර් වාසිලියෙව් මහතා සහ ශ්රී ලංකා පාර්ලිමේන්තුවේ සභානායක මෙන්ම ප්රවාහන, මහාමාර්ග සහ නාගරික සංවර්ධන අමාත්ය බිමල් රත්නායක මහතා අතර විශේෂ නිල හමුවක් රුසියාවේ State Duma හිදී පවත්වා තිබෙනවා
ශ්රී ලංකාව සහ රුසියාව අතර පවතින දීර්ඝකාලීන ඓතිහාසික බැඳීම පදනම් කරගනිමින් දෙපාර්ශ්වයේම අභිලාෂයන්ට අනුව අන්තර් පාර්ලිමේන්තු සහයෝගීතාව තවදුරටත් ශක්තිමත් කිරීම පිළිබඳව මෙහිදී නායකයන් දෙපළ දීර්ඝව සාකච්ඡා කර ඇති අතර දෙරටේ පාර්ලිමේන්තු මිත්රත්ව කණ්ඩායම අලුත් කිරීම සඳහා ද එකඟතාවකට පැමිණ තිබෙනවා
අතීතයේ සිටම රුසියාව සහ ශ්රී ලංකාව අතර ශක්තිමත් වෙළෙඳ සබඳතා පවතින බවත් දැනට ශ්රී ලාංකේය සිසුන් 800කට අධික සංඛ්යාවක් රුසියානු විශ්වවිද්යාලවල අධ්යාපනය ලබන බවත් රුසියානු සභානායකවරයා මෙහිදී සිහිපත් කළා. පවතින අභියෝගාත්මක තත්ත්වයන් යටතේ වුවද රුසියානු රාජ්යය සතු හැකියාවන් දෙරටේ අවශ්යතා වෙනුවෙන් සාධනීය ලෙස භාවිත කිරීම පිළිබඳව ද ඔහු අදහස් දැක්වූවා. රුසියානු රාජ්යය ශ්රී ලංකාවේ ස්වෛරීභාවය වෙනුවෙන් සහ ජාත්යන්තරව දක්වන සහයෝගය වෙනුවෙන් සිය ස්තූතිය පුදකළ අමාත්ය බිමල් රත්නායක මහතා මෙවැනි සහයෝගීතාවක් සඳහා දෙරට අතර ශක්තිමත් පදනමක් පවතින බව ද අවධාරණය කළා
