BitMine Immersion Technologies සමාගම පසුගිය සතිය තුළ අලුතින් ඊතර් (Ether) 71,252ක් මිලදී ගෙන ඇති බව නිවේදනය කර තිබේ. මෙය 2025 දෙසැම්බර් මාසයෙන් පසු සමාගම විසින් සතියක් තුළ සිදුකළ වේගවත්ම මිලදී ගැනීම ලෙස වාර්තා වේ. මෙම නව මිලදී ගැනීමත් සමඟ BitMine සතු මුළු ඊතර් ප්රමාණය 4,803,334 දක්වා ඉහළ ගොස් ඇති අතර, වත්මන් වෙළඳපොළ මිල අනුව එහි වටිනාකම ඇමෙරිකානු ඩොලර් බිලියන 10.2ක් පමණ වේ. මෙය මුළු එතීරියම් සැපයුමෙන් 3.98%ක ප්රතිශතයකි.
මෙම ආයෝජන උපායමාර්ගය පිළිබඳව වාර්තා වන සුවිශේෂී තොරතුරු කිහිපයක් මෙසේය. ඇමෙරිකාව සහ ඉරානය අතර පවතින යුදමය වාතාවරණය හමුවේ එතීරියම් (Ethereum) වැනි ඩිජිටල් වත්කම් සුරක්ෂිත ආයෝජනයක් ලෙස වර්ධනය වෙමින් පවතින බව BitMine සභාපති ටොම් ලී (Tom Lee) පවසයි. යුද්ධය ආරම්භ වූ දා සිට එතීරියම් අගය 6.8%කින් ඉහළ ගොස් ඇති අතර, එය රත්රන් සහ කොටස් වෙළඳපොළ දර්ශකයන්ට (S&P 500) වඩා ඉහළ මට්ටමක පවතින බව ඔහු පෙන්වා දෙයි. ක්රිප්ටෝ වෙළඳපොළේ පවතින මන්දගාමී තත්ත්වය දැන් අවසන් අදියරට පැමිණ ඇති බව සමාගමේ විශ්වාසයයි.
මීට අමතරව, BitMine සමාගම ලබන අප්රේල් 9 වැනිදා සිට නිව්යෝර්ක් කොටස් වෙළඳපොළේ (NYSE) ප්රධාන ලැයිස්තුවට (Main Board) ඇතුළත් වීමට නියමිතය. එහිදී ඔවුන් ‘BMNR’ යන සංකේතය යටතේ ගනුදෙනු කරනු ඇත. එමෙන්ම ආයතනික මට්ටමේ ආයෝජකයන් සඳහා ‘MAVAN’ නමින් නව ස්ටේකින් (Staking) වේදිකාවක් ද හඳුන්වා දී ඇති අතර, ඒ හරහා වසරකට ඩොලර් මිලියන 196ක ආදායමක් උපයා ගැනීමට සමාගම අපේක්ෂා කරයි. මෙම පියවරයන් සමඟින් එතීරියම් ආශ්රිත ලැයිස්තුගත සමාගම් අතර BitMine හි බලපෑම තවදුරටත් ශක්තිමත් වනු ඇතැයි විචාරකයෝ පවසති.
