බ්රිතාන්ය අගමැති කීර් ස්ටාර්මර්ගේ කම්කරු පක්ෂය දශක කිහිපයක සිට රඳවාගෙන සිටි මැන්චෙස්ටර් ප්රදේශයේ සිය බලකොටුවක් පසුගිය සිකුරාදා (26) පැවැති අතුරු මැතිවරණයෙන් අමිහිරි ලෙස පරාජයට පත්විය. මෙය බ්රිතාන්යයේ සාම්ප්රදායික ද්වි-පක්ෂ දේශපාලන ක්රමය බිඳවැටෙමින් පවතින බව පෙන්නුම් කරන ප්රබල සන්ධිස්ථානයක් ලෙස දේශපාලන විචාරකයෝ හඳුන්වති.
වසරකට ආසන්න කාලයක් තුළ පැවැති විශාලතම මැතිවරණ පරීක්ෂණය ලෙස සැලකෙන මෙම “ගෝර්ටන් සහ ඩෙන්ටන්” (Gorton and Denton) ආසනයේ පරාජයත් සමඟ, අගමැති ස්ටාර්මර්ට සිය ධුරයෙන් ඉල්ලා අස්වන ලෙස එල්ල වන පීඩනය තවදුරටත් දැඩි වී තිබේ. සති කිහිපයක සිට බ්රිතාන්ය දේශපාලනය තුළ පවතින අර්බුදකාරී වාතාවරණය හමුවේ මෙම ප්රතිඵලය කම්කරු පක්ෂයට එල්ල වූ දරුණු පහරකි.
මෙහිදී වාමාංශික හරිත පක්ෂයේ (Green Party) හැනා ස්පෙන්සර් ජයග්රහණය වාර්තා කළ අතර, නයිජල් ෆැරාජ්ගේ රෙෆෝම් යූකේ (Reform UK) පක්ෂය දෙවන ස්ථානයට පත්විය. මීට පෙර අතිවිශාල බහුතරයකින් කම්කරු පක්ෂය ජයග්රහණය කළ මෙම ආසනයේ ඔවුන්ට මෙවර හිමිවූයේ තෙවන ස්ථානය පමණි. මෙම ප්රතිඵලය “පැහැදිලිවම බලාපොරොත්තු සුන් කරවන සුළු එකක්” බව කම්කරු පක්ෂයේ සභාපතිනී ඇනා ටර්ලි ප්රකාශ කර ඇත.
