කැනඩාවේ නව අග්රාමාත්ය මාක් කාර්නි (Mark Carney) මහතා සහ රිලයන්ස් ඉන්ඩස්ට්රීස් (Reliance Industries) සභාපති මුකේෂ් අම්බානි මහතා අතර විශේෂ හමුවක් පසුගියදා මුම්බායි නුවරදී පවත්වා තිබේ. දෙරට අතර ආර්ථික සබඳතා ශක්තිමත් කරමින් 2030 වසර වන විට ද්විපාර්ශ්වික වෙළඳාම ඇමෙරිකානු ඩොලර් බිලියන 50 දක්වා ඉහළ නැංවීම මෙහි ප්රධාන ඉලක්කය වී ඇත.
කැනඩා අගමැතිවරයා සිය නිල ‘X’ ගිණුම හරහා අද (මාර්තු 03) ප්රකාශ කළේ, ඉන්දියාව සමඟ පවතින වෙළඳාම දෙගුණ කිරීමට සහ කැනේඩියානු ව්යාපාර සඳහා දැවැන්ත ආයෝජන ආකර්ෂණය කර ගැනීමට තම රජය සූදානම් බවයි. බලශක්තිය, තීරණාත්මක ඛනිජ සම්පත් (Critical Minerals) සහ තාක්ෂණික ක්ෂේත්රයන්හි සහයෝගීතාවය පිළිබඳව මෙහිදී වැඩි අවධානයක් යොමු වී තිබේ.
අග්රාමාත්ය නරේන්ද්ර මෝදි මහතාගේ ආරාධනයකට අනුව පෙබරවාරි 27 සිට මාර්තු 02 දක්වා ඉන්දියාවේ නිල සංචාරයක නිරත වූ මාක් කාර්නි මහතා, දිල්ලියේ පිහිටි හයිද්රාබාද් හවුස්හිදී මෝදි අගමැතිවරයා සමඟ ද ද්විපාර්ශ්වික සාකච්ඡා පැවැත්වීය.
දෙරට අතර පුළුල් ආර්ථික හවුල්කාරිත්ව ගිවිසුමක් (Comprehensive Economic Partnership Agreement – CEPA) සඳහා වන නිල සාකච්ඡා ද මෙලෙස ආරම්භ කර ඇත. මෙය දෙරටේම ආර්ථිකයන් වඩාත් ඔරොත්තු දෙන සහ ශක්තිමත් මට්ටමකට ගෙන ඒමට මෙන්ම ඉහළ වැටුප් සහිත වෘත්තීය අවස්ථාවන් නිර්මාණය කිරීමට දායක වනු ඇති බව අගමැති කාර්නි පෙන්වා දෙයි.
කැනඩාවේ හිටපු අගමැති ජස්ටින් ටෘඩෝගේ පාලන සමයේදී ඇති වූ රාජ්ය තාන්ත්රික ගැටුම්වලින් පසුව, නව අගමැති මාක් කාර්නි යටතේ ඉන්දියාව සහ කැනඩාව අතර සබඳතා නැවත යථා තත්ත්වයට පත්වීම කලාපීය දේශපාලනයේ සුවිශේෂී හැරවුම් ලක්ෂයකි.
