අමෙරිකාව සහ ඊශ්රායලය එක්ව ඉරානයට එල්ල කළ ගුවන් ප්රහාර මාලාව “ජාත්යන්තර නීතියට අනුකූල නොවන” බව කැනඩා අගමැති මාර්ක් කාර්නි (Mark Carney) අද (04) ප්රකාශ කළේය. ඕස්ට්රේලියාවේ සිඩ්නි නුවර පැවැති ‘ලෝවි ආයතනයේ’ (Lowy Institute) සම්මන්ත්රණයකදී ඔහු අවධාරණය කළේ, එක්සත් ජාතීන්ගේ සංවිධානය හෝ සෙසු මිත්ර රටවල් සමඟ සාකච්ඡා කිරීමකින් තොරව මෙලෙස ප්රහාර එල්ල කිරීම කනගාටුවට කරුණක් බවයි.
අගමැති කාර්නි පෙන්වා දෙන්නේ මැදපෙරදිග අස්ථාවරත්වයට සහ භීෂණයට ප්රධාන හේතුව ඉරාන පාලනය බව කැනඩාව පිළිගන්නා නමුත්, ජාත්යන්තර නීති රීතිවලට බාහිරව මෙලෙස යුදමය ක්රියාමාර්ග ගැනීම අනුමත කළ නොහැකි බවයි. පවතින ගැටුම්කාරී වාතාවරණය වහාම සමනය (De-escalation) කරන ලෙසත්, ජාත්යන්තර නීතියට ගරු කරන ලෙසත් ඔහු සියලු පාර්ශ්වයන්ගෙන් ඉල්ලා සිටියේය.
කැනඩා අගමැතිවරයා සහ අමෙරිකානු ජනාධිපති ඩොනල්ඩ් ට්රම්ප් අතර මෑතක සිට විවිධ දේශපාලනික මතභේද පවතී. ට්රම්ප් පරිපාලනය විසින් කැනඩාවට පනවා ඇති බදු සහ විවිධ තර්ජන හමුවේ, අමෙරිකාව මත යැපීම අවම කර ආසියා-පැසිෆික් කලාපයේ සෙසු රටවල් සමඟ සබඳතා ශක්තිමත් කර ගැනීමට අගමැති කාර්නි වර්තමානයේ උත්සාහ කරමින් සිටී. මෙම ප්රහාරය අමෙරිකාව ප්රමුඛ ලෝක පර්යාය බිඳවැටීමේ තවත් එක් උදාහරණයක් බව ඔහු පවසයි.
මැදපෙරදිග සාමය ස්ථාපිත කිරීම සඳහා ඕනෑම අවස්ථාවක සහාය වීමට කැනඩාව සූදානම් බව පැවසූ අගමැතිවරයා, ජාත්යන්තර පාලන පද්ධතියේ පවතින දුර්වලතා හමුවේ කැනඩාව වැනි “මධ්යම බලවතුන්” (Middle Powers) එක්ව කටයුතු කිරීමේ වැදගත්කම ද මෙහිදී අවධාරණය කළේය.
