ශ්රී ලංකාව මුහුණ දෙන ඕනෑම දුෂ්කරතාවයකදී උපකාර කිරීමට චීනය නිරන්තරයෙන් සූදානම් බව ශ්රී ලංකාවේ චීන තානාපති ෂී ෂෙන්ග්හොන්ග් මහතා පවසයි. ඊයේ (අප්රේල් 13) අකුරණ බානාගල චීන භාෂා මධ්යස්ථානය විවෘත කිරීමේ අවස්ථාවට එක්වෙමින් ඒ මහතා අවධාරණය කළේ චීනය සහ ශ්රී ලංකාව වසර 2000ක පමණ සිට සමීප සබඳතා පවත්වන කල්යාණ මිත්ර රටවල් දෙකක් බවයි. වත්මන් ගෝලීය යුදමය තත්ත්වයන් හමුවේ ශ්රී ලංකාවට ඇති විය හැකි ඉන්ධන හිඟය වැනි ගැටලු මඟහරවා ගැනීමට චීනය මුලින්ම ඉදිරිපත් වූ බවත්, ස්වභාවික විපත් ඇතුළු සෑම අවස්ථාවකදීම චීනය ලාංකිකයන් වෙනුවෙන් සහයෝගය ලබා දෙන බවත් ඒ මහතා වැඩිදුරටත් සඳහන් කළේය.
ශ්රී ලංකා චීන බෞද්ධ සංස්කෘතික හුවමාරු මධ්යස්ථානයේ අධ්යක්ෂ පූජ්ය පරණගම ඥාණවිමල නාහිමියන්ගේ මෙහෙයවීමෙන් සහ චීන තානාපති කාර්යාලයේ අනුග්රහයෙන් මෙම භාෂා මධ්යස්ථානය විවෘත කෙරුණු අතර, මෙහිදී ප්රදේශයේ ජනතාව වෙනුවෙන් රුපියල් ලක්ෂ 20ක වියළි ආහාර ද්රව්ය බෙදා දීමක් ද සිදු විය. ශ්රී දළදා මාලිගාවේ දියවඩන නිලමේ ප්රදීප් නිලංග දෑල මහතා ඇතුළු සම්භාවනීය පිරිසක් සහභාගී වූ මෙම උත්සවයේදී තානාපතිවරයා කියා සිටියේ ඉදිරියටත් ලාංකිකයන්ට අවශ්ය උපකාර කිරීමට චීනය සැමවිටම බලාපොරොත්තු වන බවයි.
