ඊශ්රායල අගමැති බෙන්ජමින් නෙදන්යාහුගේ හමුදා ලේකම්වරයා ලෙස කටයුතු කරන මේජර් ජෙනරාල් රෝමන් ගොෆ්මන් (Maj. Gen. Roman Gofman), එරට ප්රබල බුද්ධි ඒජන්සිය වන ‘මොසාඩ්’ හි මීළඟ අධ්යක්ෂවරයා ලෙස පත් කිරීමට අනුමැතිය හිමිව තිබේ. ජුනි 02 වනදා සිට ක්රියාත්මක වන පරිදි වසර පහක කාලයක් සඳහා ඔහු මෙම ධුරයේ කටයුතු කරනු ඇත. වත්මන් මොසාඩ් ප්රධානී ඩේවිඩ් බර්නියාගේ සේවා කාලය අවසන් වීමෙන් පසු ගොෆ්මන් එම වගකීම භාර ගැනීමට නියමිතය.
කෙසේ වෙතත්, මෙම පත්වීම සම්බන්ධයෙන් විවිධ මතභේද මතුව ඇත්තේ 2022 වසරේදී ඔහු සම්බන්ධ වූ සිදුවීමක් හේතුවෙනි. එවකට ප්රාදේශීය බලකා අණදෙන නිලධාරියා ලෙස කටයුතු කළ ගොෆ්මන්, 17 හැවිරිදි තරුණයෙකු යොදා ගනිමින් ඉරානයට සහ හමාස් සංවිධානයට එරෙහිව සමාජ මාධ්ය මෙහෙයුමක් දියත් කර තිබුණි. එහිදී රහස්ය තොරතුරු අනාවරණය කිරීමේ චෝදනාව මත අදාළ තරුණයා මාස 18ක් රක්ෂිත බන්ධනාගාරගතව සිටි අතර, පසුව එම තොරතුරු හමුදා බුද්ධි අංශ මඟින්ම ලබා දුන් ඒවා බව හෙළි වීමෙන් පසු ඔහු නිදහස් කෙරිණි. අගමැති නෙදන්යාහුට ඉතා සමීප පුද්ගලයෙකු ලෙස සැලකෙන ගොෆ්මන්ට මොසාඩ් ආයතනය මෙහෙයවීමට අවශ්ය මෙහෙයුම් සහ බුද්ධිමය පසුබිම නොමැති බවට එරට හිටපු ආරක්ෂක නිලධාරීන්ගෙන් ද විවේචන එල්ල වෙමින් පවතී.
