ඇමරිකාවේ ඔහියෝ ප්රාන්තයේ සින්සිනාටි නගරයේ පිහිටි ‘රිවර්ෆ්රන්ට් ලයිව්’ (Riverfront Live) සංගීත ප්රසංග ශාලාව තුළ පසුගිය ඉරිදා (මාර්තු 01) අලුයම සිදුවූ සමූහ වෙඩි තැබීමේ සිද්ධියට සම්බන්ධ සැකකරුවන් දෙදෙනෙකු පොලිසිය විසින් අත්අඩංගුවට ගෙන තිබේ. පුද්ගලයන් 9 දෙනෙකුට තුවාල සිදු කළ මෙම ප්රහාරය සම්බන්ධයෙන් අත්අඩංගුවට ගත් සැකකරුවන් 24 හැවිරිදි ෆ්රැනීක් කොබ් (Franeek Cobb) සහ 29 හැවිරිදි ඩෙරික් ලෝන්ග් (Derrick Long) ලෙස හඳුනාගෙන ඇත. හැමිල්ටන් ප්රාන්ත අධිකරණ වාර්තාවලට අනුව මොවුන් දෙදෙනාටම එරෙහිව දරුණු ගණයේ අපරාධ චෝදනා (Felonious assault) එල්ල කර තිබේ.
සැකකරුවන් දෙදෙනාම මීට පෙර අවි ආයුධ සම්බන්ධ වැරදිවලට වරදකරුවන් වූවන් වන අතර ඔවුන්ට නීත්යානුකූලව ගිනිඅවි ළඟ තබා ගැනීම තහනම් කර තිබුණි. ෆ්රැනීක් කොබ් මීට පෙර කොකේන් ජාවාරම් කිරීම සහ අවි සඟවාගෙන යාම යන චෝදනාවලට වරදකරු වී 2025 වසරේදී වසරක සිරදඬුවමක් විඳ මෑතකදී නිදහස්ව පැමිණි අයෙකි. ඩෙරික් ලෝන්ග් ද නීතිවිරෝධී ලෙස ආයුධ ළඟ තබා ගැනීම, ගිනි තැබීම් (Arson) සහ සොරකම් කරන ලද දේපළ ළඟ තබා ගැනීම යන වරදවල් සම්බන්ධයෙන් සිරදඬුවම් විඳ ඇති අයෙකු ලෙස හඳුනාගෙන ඇත.
ප්රහාරය එල්ල වන අවස්ථාවේදී අදාළ ප්රසංග ශාලාව තුළ 500ත් 600ත් අතර පිරිසක් රැඳී සිට ඇති අතර, ලෝහ අනාවරක (Metal detectors) සහ ආරක්ෂක පරීක්ෂාවන් මධ්යයේ මෙම සැකකරුවන් ගිනිඅවි රැගෙන ශාලාව තුළට ඇතුළු වූයේ කෙසේද යන්න පිළිබඳව ප්රසංග ශාලාවේ හිමිකරු වන ටිම් ජෝර්ඩන් සිය මවිතය පළ කර තිබේ. තුවාල ලැබූ 9 දෙනාම මේ වන විට රෝහල්ගතව ප්රතිකාර ලබන අතර ඔවුන්ගේ ජීවිතවලට අවදානමක් නොමැති බව වාර්තා වේ.
