1989 ඔක්තෝබර් 27 වැනිදා කටුනායක වෙළෙඳ කලාපයේ සේවක අයිතිවාසිකම් වෙනුවෙන් පෙනී සිටි එච්. එම්. රංජිත් සහ ඔහුගේ නීති උපදේශක ලයනල් යන මහත්වරුන් පැහැරගෙන ගොස් අමානුෂික ලෙස ඝාතනය කිරීමේ සිද්ධිය සම්බන්ධයෙන් වසර 36කට පසු යළි විමර්ශන ආරම්භ කර තිබේ. රංජිත් මහතාගේ එවකට පෙම්වතිය වූ ප්රකට මානව හිමිකම් ක්රියාකාරිනී ජයන්ති දන්දෙණිය මහත්මිය විසින් මහජන ආරක්ෂක අමාත්යාංශයේ ලේකම් රවී සෙනවිරත්න මහතා වෙත මෙම නව පැමිණිල්ල ඉදිරිපත් කර ඇත.
මෙම අතිශය සංවේදී සිදුවීමේ ප්රධාන කරුණු කිහිපයක් මෙසේය. මෙම ඝාතනය සිදුවූ අවස්ථාවේ එම ස්ථානයේ සිටි හිටපු ඇමති ජෙයරාජ් ප්රනාන්දුපුල්ලේ මහතා අපරාධ පරීක්ෂණ දෙපාර්තමේන්තුවට ලබාදුන් සාක්කියට අනුව, එවකට කටුනායක පොලිසියේ සිටි උඩුගම නමැති නිලධාරියෙකු මෙම පැහැර ගැනීමට සෘජුවම සම්බන්ධ බවට සැක කෙරේ. විමර්ශනයකට කැඳවා පසුව පැහැරගෙන ගිය මෙම දෙදෙනා සීදුව රද්දොළුව හන්දියේදී වෙඩි තබා අඩපණ කර, පසුව ටයර් දමා පුළුස්සා තිබූ බවත්, ඔවුන්ගේ සිරුරු පවා සොයා ගැනීමට නොහැකි වූ බවත් ජයන්ති මහත්මිය පවසයි. යුක්තිය ඉල්ලා සිටි අවස්ථාවලදී පොලිස් නිලධාරීන්ගෙන් තර්ජන එල්ල වුවද, ජයන්ති මහත්මිය සිය සටන අත්නොහළ අතර ඇයගේ මානව හිමිකම් මෙහෙවර වෙනුවෙන් දකුණු කොරියාවෙන් පවා සම්මානයට පාත්ර විය.
නීතිඥ මාධව ඊරියගම මහතාගේ උපදෙස් මත ඉදිරිපත් කළ මෙම නව පැමිණිල්ල සම්බන්ධයෙන් විධිමත් පරීක්ෂණයක් පවත්වන ලෙස මහජන ආරක්ෂක අමාත්යාංශය පොලිස්පතිවරයාට උපදෙස් දී ඇත. මෙය ඝාතනයක් බැවින් කාලය ඉක්මවා යාම නඩු පැවරීමට බාධාවක් නොවන අතර, වත්මන් රජය යටතේ හෝ තමන්ට යුක්තිය ඉටු වනු ඇතැයි ජයන්ති මහත්මිය විශ්වාසය පළ කරයි.
