පවතින වෙළෙඳපොළ වර්ධනයන් හමුවේ ආයෝජක විශ්වාසය තහවුරු වෙමින් කොළඹ කොටස් වෙළෙඳපොළ අද (20) දිනය නිමා කළේ ප්රධාන දර්ශකයන්ගේ ඉහළ යෑමක් වාර්තා කරමිනි. පසුගිය දිනවල පැවති අස්ථාවරත්වයෙන් මිදී වෙළෙඳපොළ ස්ථාවර මට්ටමකට පැමිණෙන ලකුණු පෙන්නුම් කරමින් සමස්ත මිල දර්ශකය (ASPI) ඒකක 375.72කින් (1.85%) ඉහළ ගොස් ඒකක 20,639.73ක් ලෙස සටහන් විය.
සිල්ලර හා ආයතනික ආයෝජකයින්ගේ සහභාගීත්වය ඉහළ යාම මෙම වර්ධනයට ප්රධාන හේතුව වී ඇති අතර, එස් ඇන්ඩ් පී ශ්රී ලංකා 20 (S&P SL20) දර්ශකය ද ඒකක 100.78කින් (1.78%) ඉහළ ගොස් ඒකක 5,752.19ක් ලෙස වාර්තා විය. අද දින වෙළෙඳපොළ පිරිවැටුම රුපියල් බිලියන 4.39ක් ලෙස සටහන් වූ අතර කොටස් මිල ඉහළ ගිය සමාගම් 182ක් සහ මිල පහළ ගිය සමාගම් 47ක් ලෙස වෙළෙඳපොළ ක්රියාකාරීත්වය බෙහෙවින් යහපත් මට්ටමක පැවතුණි.
ප්රාග්ධන භාණ්ඩ (Capital Goods) අංශය වෙළෙඳපොළ පිරිවැටුමට වැඩිම දායකත්වය ලබා දුන් අතර, එහිදී ජෝන් කීල්ස් හෝල්ඩින්ග්ස් (JKH.N) සමාගම රුපියල් බිලියන 1.15ක පිරිවැටුමක් වාර්තා කරමින් පෙරමුණ ගත්තේය. දර්ශකයේ වර්ධනයට වැඩිම දායකත්වයක් ලබා දුන් අනෙකුත් සමාගම් අතර සම්පත් බැංකුව (SAMP.N), හේලීස් (HAYL.N), කලම්බු ඩොක්යාර්ඩ් (DOCK.N) සහ මෙල්ස්ටාකෝප් (MELS.N) ප්රමුඛ විය.
