කියුබාවේ ප්රධානතම තාප විදුලි බලාගාරයක් වන ‘ඇන්ටෝනියෝ ගුයිටෙරාස්’ (Antonio Guiteras) බලාගාරයේ බොයිලේරුවක ඇති වූ දෝෂයක් හේතුවෙන් එරට බටහිර ප්රදේශයේ මිලියන සංඛ්යාත ජනතාවකට විදුලිය විසන්ධි වී ඇති අතර, මේ වන විට එහි අලුත්වැඩියා කටයුතු අවසන් කර ඇති බව බලධාරීහු පවසති. අධික උෂ්ණත්වය සහ සීමිත ඉඩකඩ මධ්යයේ අනතුරුදායක මෙහෙයුමකින් පසු බලාගාරය යථා තත්ත්වයට පත් කිරීමට විදුලි ඉංජිනේරුවන්ට දැඩි පරිශ්රමයක් දැරීමට සිදු විය.
මෙම බලශක්ති අර්බුදය තීව්ර වී ඇත්තේ ඇමෙරිකානු ජනාධිපති ඩොනල්ඩ් ට්රම්ප් විසින් කියුබාවට එරෙහිව පනවා ඇති දැඩි ආර්ථික සම්බාධක සහ තෙල් අවහිර කිරීම් මධ්යයේය. විශේෂයෙන්ම වෙනිසියුලාවෙන් ලැබෙන ඉන්ධන සැපයුම නතර කිරීමට ඇමෙරිකාව පියවර ගැනීම නිසා කියුබාවේ විදුලි උත්පාදනයට දැඩි පහරක් වැදී ඇති අතර, ට්රම්ප් ප්රකාශ කර ඇත්තේ කියුබාවේ පාලන තන්ත්රය වෙනස් කිරීම “කාලය පිළිබඳ ප්රශ්නයක්” පමණක් බවයි. දැනට එරට නිපදවිය හැක්කේ සමස්ත ඉල්ලුමෙන් අඩකටත් වඩා අඩු මෙගාවොට් 1,000ක ධාරිතාවක් පමණක් වීම නිසා දිගුකාලීන විදුලි කප්පාදුවට එරෙහිව කියුබානු වැසියන් කරුවලේම සිය විරෝධය පළ කරමින් සිටිති.
මෙම තත්ත්වයට විසඳුමක් ලෙස කියුබාව චීනයේ සහාය ඇතිව සූර්ය බලශක්ති ව්යාපෘති වෙත කඩිනමින් යොමු වීමට උත්සාහ කළත්, දශක ගණනාවක් පුරා පවතින ඇමෙරිකානු වෙළඳ සම්බාධක හේතුවෙන් එරට ආර්ථික හා මානුෂීය අර්බුදය තවදුරටත් දරුණු වෙමින් පවතින බව විදෙස් වාර්තා පෙන්වා දෙයි.
