දඹුල්ල ප්රාදේශීය ලේකම් කාර්යාලයට අනුයුක්තව සේවය කරන රාජ්ය නිලධාරියෙකු වන තුෂාර ජයවර්ධන මහතා, තමන්ට හමු වූ රුපියල් 213,780ක මුදලක් පොලිස් සහය ඇතිව එහි නියමිත හිමිකරු වෙත භාර දීමට කටයුතු කරමින් සමාජයට විශාල ආදර්ශයක් ලබා දී තිබේ. පසුගිය බදාදා (25) දඹුල්ල නගරයේ වෙළඳසැල් කිහිපයකින් භාණ්ඩ මිලදී ගෙන නිවසට පැමිණි අවස්ථාවේදී, තමන් මිලදී ගත් බෑග් අතර තිබූ හඳුනා නොගත් බෑග් දෙකක් තුළ මෙම මුදල් තිබෙනු ඔහුට හමු වී ඇත. මුදල්වල හිමිකරු පිළිබඳ කිසිදු තොරතුරක් නොදැන සිටි බැවින් හෙතෙම වහාම ක්රියාත්මක වී ඒ පිළිබඳව දඹුල්ල පොලිස් ස්ථානය වෙත පැමිණිල්ලක් ඉදිරිපත් කිරීමට පියවර ගත්තේය.
දඹුල්ල මූලස්ථාන පොලිස් පරීක්ෂකවරයාගේ උපදෙස් පරිදි වහාම පරීක්ෂණ ආරම්භ කළ පොලිස් නිලධාරීන්, අදාළ නිලධාරියා භාණ්ඩ මිලදී ගත් වෙළඳසැල් සම්බන්ධ කර ගනිමින් බෑග්වල හිමිකරු සොයා ගැනීමට සමත් විය. පසුව අනාවරණය වූයේ එම මුදල්වල හිමිකරු දඹුල්ල ආර්ථික මධ්යස්ථානය අසල පිහිටි මුස්ලිම් පල්ලියක භාණ්ඩාගාරිකවරයා බවයි. රමසාන් සමය වෙනුවෙන් ආගමික කටයුතු සඳහා බැතිමතුන්ගෙන් ලැබුණු පරිත්යාග මුදල් මෙලෙස අස්ථානගත වී තිබූ අතර, පොලිස් නිලධාරීන් ඉදිරියේ එම මුදල් නැවත භාණ්ඩාගාරිකවරයා වෙත සුරක්ෂිතව භාර දෙන ලදී.
