ඉන්දීය සාගරයේ උපායමාර්ගිකව වැදගත් ස්ථානයක පිහිටි දියේගෝ ගාසියා (Diego Garcia) දූපතේ පාලනය මුරුසි (Mauritius) රාජ්යයට පැවරීමට බ්රිතාන්යය ගෙන ඇති තීරණයට ඇමරිකානු ජනාධිපති ඩොනල්ඩ් ට්රම්ප් සිය දැඩි විරෝධය පළ කර තිබේ. ඉරානයට එරෙහිව එල්ල කිරීමට සැලසුම් කර ඇති ප්රහාරයන් සඳහා මෙම දූපතේ පිහිටි ගුවන් හමුදා කඳවුර අත්යවශ්ය බවත්, එබැවින් එය දිගටම බ්රිතාන්ය පාලනය යටතේ තබා ගත යුතු බවත් ට්රම්ප් බ්රිතාන්ය අග්රාමාත්ය කියර් ස්ටාර්මර්ට පෙන්වා දී ඇත.
දියේගෝ ගාසියා දූපත ශ්රී ලංකාවේ සිට දකුණු දෙසට කිලෝමීටර් 1,600 ක් පමණ දුරින් පිහිටා ඇති අතර, එය බ්රිතාන්ය ඉන්දීය සාගර කලාපයට අයත් වේ. වසර ගණනාවක රාජ්යතාන්ත්රික මතගැටුම්වලින් පසුව, 2024 ඔක්තෝබර් මාසයේදී බ්රිතාන්යය එකඟ වූයේ චාගෝස් දූපත් සමූහයේ ස්වෛරීභාවය මොරිෂස් රාජ්යයට පැවරීමටයි. එම ගිවිසුම යටතේ දියේගෝ ගාසියා කඳවුර වසර 100ක බදු පදනම මත බ්රිතාන්යය සතුව තබා ගැනීමට සැලසුම් කර තිබුණද, ට්රම්ප් පවසන්නේ එම පවරා දීම සිදු නොකළ යුතු බවයි.
ඇමරිකාව සහ බ්රිතාන්යය හවුලේ භාවිත කරන මෙම කඳවුර මැදපෙරදිග සහ ඉන්දු-පැසිෆික් කලාපයේ ආරක්ෂක මෙහෙයුම් සඳහා අතිශය තීරණාත්මක මධ්යස්ථානයක් ලෙස සැලකේ. ට්රම්ප්ගේ මෙම නව ස්ථාවරයත් සමඟ බ්රිතාන්යය සහ මොරිෂස් රාජ්යය අතර ඇති කරගත් එකඟතාවය දැඩි අර්බුදයකට ලක්වීමේ ලකුණු පහළ වී තිබේ.
