මත්ද්රව්ය ජාවාරමෙන් උපයාගත් බවට සැකකෙරෙන රුපියල් මිලියන 30කට අධික වටිනාකමකින් යුත් දේපළක් තහනම් කිරීමට (Freeze) ශ්රී ලංකා පොලිසියේ නීති විරෝධී වත්කම් විමර්ශන කොට්ඨාසය අද (05) පියවර ගෙන තිබේ. මෑතකදී විදේශගතව සිට මෙරටට ගෙන්වනු ලැබූ ප්රබල සංවිධානාත්මක අපරාධකරුවෙකු විසින් මත්ද්රව්ය ජාවාරමෙන් උපයාගත් මුදල් භාවිත කරමින් සිය දියණියගේ නමින් පන්නිපිටිය ප්රදේශයෙන් මිලදී ගෙන ඇති බවට සැකකෙරෙන දෙමහල් නිවසක් සහ ඉඩමක් මෙලෙස පොලිස් විමර්ශනයට ලක්ව ඇත.
මුදල් විශුද්ධිකරණය වැළැක්වීමේ පනතේ ප්රතිපාදනවලට අනුව මාර්තු 05 වැනිදා සිට දින හතක කාලයක් සඳහා මෙම දේපළ තහනම් කිරීමට නියෝග නිකුත් කර තිබේ. මෙම අපරාධකරු මීට පෙර විදේශගතව සිටිමින් මෙරට මත්ද්රව්ය ජාලය මෙහෙයවා ඇති බවත්, ඔහු විසින් මෙලෙස නීති විරෝධීව උපයාගත් තවත් දේපළ රැසක් පවතින බවට පොලිසිය සැක කරයි. නීති විරෝධී වත්කම් විමර්ශන කොට්ඨාසය මේ සම්බන්ධයෙන් වැඩිදුර විමර්ශන මෙහෙයවන අතර ඉදිරියේදී එම දේපළ රාජසන්තක කිරීමට අවශ්ය නීතිමය පියවර ගැනීමට නියමිතය.
