මත්ද්රව්යවලට ඇබ්බැහි වූවන් ස්වේච්ඡාවෙන් පුනරුත්ථාපනය කිරීම සඳහා මහජන ආරක්ෂක අමාත්යාංශය යටතේ පවතින පුනරුත්ථාපන කාර්යාංශය ආරම්භ කළ නව වැඩපිළිවෙළ සාර්ථකව ක්රියාත්මක වන බව එම කාර්යාංශය නිවේදනය කරයි. මෙම වැඩසටහන යටතේ සිය පුනරුත්ථාපන කාලසීමාව නිම කළ පළමු කණ්ඩායම මේ වන විට සාර්ථකව පිටත්ව ගොස් ඇති බව පුනරුත්ථාපන කාර්යාංශයේ සහකාර කොමසාරිස් කර්නල් චන්න ගෝමස් මහතා අද (23) ප්රකාශ කළේය.
මීට පෙර පුනරුත්ථාපන කටයුතු අධිකරණ නියෝග මත පමණක් සිදු වූ අතර, නව ක්රමවේදය යටතේ ඕනෑම පුද්ගලයෙකුට සිය කැමැත්තෙන්ම පුනරුත්ථාපනය සඳහා ඉදිරිපත් වීමේ අවස්ථාව සලසා දී තිබේ. වැලිකන්දේ පිහිටි සේනපුර පුනරුත්ථාපන මධ්යස්ථානය මූලික කරගනිමින් මෙම කටයුතු සිදු කෙරෙන අතර, එහිදී මාස තුනක කාලයක් තුළ උපදේශනය, වෛද්ය ප්රතිකාර සහ වෘත්තීය පුහුණුව ලබාදීම සිදු කෙරේ.
ස්වේච්ඡාවෙන් ඉදිරිපත් වන පිරිස් සඳහා නේවාසික පහසුකම්, ආහාර පාන සහ වෛද්ය පහසුකම් රජය විසින් නොමිලේ සපයනු ලැබේ. මෙමගින් මත්ද්රව්යවලට ඇබ්බැහි වූවන් අපරාධකරුවන් ලෙස නොව, ප්රතිකාර ලැබිය යුතු වින්දිතයන් ලෙස සලකා ඔවුන් යළි සාර්ථකව සමාජගත කිරීම අරමුණු කෙරේ.
මත්ද්රව්ය ඇබ්බැහි වීමෙන් නිදහස් වීමට කැමති අයෙකුට හෝ ඔවුන්ගේ පවුල්වල සාමාජිකයන්ට පහත සඳහන් අංශ හරහා වැඩිදුර තොරතුරු සහ මගපෙන්වීම් ලබාගත හැකිය:
- හදිසි ඇමතුම් අංකය: 0112 883 891
- වෙනත් අංක: 0112 187 050
