කාර්මික විප්ලවයෙන් පසු, වර්තමානයේ තාක්ෂණ විප්ලවයක් ඇති වී තිබෙන බවත්,මේ නිසා සෑම විශ්වවිද්‍යාල සිසුවෙකුට ම තොරතුරු තාක්ෂණය ඉගෙනගත හැකි පරිදි පාඨමාලා සකස් කරන බවත් අධ්‍යාපන අමාත්‍ය දිනේෂ් ගුණවර්ධන මහතා පවසයි.
අමාත්‍යවරයා මේ බව පැවසුවේ පසුගිය 05 වනදා මාලබේ පිරිමි විද්‍යාලයේ තාක්ෂණ පීඨ විද්‍යා තෙමහල් ගොඩනැගිල්ලේ, ඉදිකිරීම් ආරම්භ කිරීමේ උත්සවයට එක්වෙමිනි.
ඒ අනුව විශ්වවිද්‍යාලය තුළදී, සිසුන් තොරතුරු තාක්ෂණය, විෂයයක් ලෙස තෝරාගත්තද, තෝරා නොගත්තද, එම සිසුන් ඉන් පිටව යන්නේ, තොරතුරු තාක්ෂණයේ නිපුනතාවක් සහිත දරුවකු ලෙසින් බව, අමාත්‍යවරයා කියා සිටියේය.
මෙම ක්‍රමවේදය පාසල් තුළටත් ගෙන ආ යුතු බව, කාගේත් පිළිගැනීම බවද, ඔහු සඳහන් කළේය.
මායාදුන්න හා රාජසිංහ රජවරුන් පෘතුගීසින්ට එරෙහිව ජයග්‍රහණයක් ලබාගැනීමට දේශිය තාක්ෂණය යොදවා ගත් බවත්, රටේ තාක්ෂණයෙන් නිෂ්පාදනය කරන ලද ඒ අවි ආයුධ ලොව අසම සම ආයුධ වූ බව ලෙස ඉතිහාසයේ සටහන්ව ඇති බවත්, අධ්‍යාපන අමාත්‍ය දිනේෂ් ගුණවර්ධන මහතා, පැවසීය. ලොව උසස් ම කඩුවට නොදෙවෙනි වන කඩුවකින් අපේ රණ විරුවන් සටන් කළ බව ඉතිහාසගත වී ඇතැයිද අමාත්‍යවරයා කියා සිටියේය.
තාක්ෂණ විද්‍යාව විෂයය ඉතාම විශේෂිත විෂයයක් බව පැවසූ ඔහු, රටක කාර්මික දියුණුවේ පදනම වානේ කර්මාන්තය බව හෙතෙම පැවසිය.
වානේ සංස්ථාව පිහිටුවීමේ ඉතිහාසයද අමාත්‍යවරයා සිහිපත් කළේය. සෝවියට් රුසියාවේ සහයෝගයෙන් අදියරෙන් අදියරට මෙරට වානේ කර්මාන්තය, ස්ථාපිත කිරීමට හැකි වූ බවත්, ඒ සඳහා මෙරට පොළොවේ යපස් උපකාරී වූ බවත් ඔහු පැවසීය. වානේ සංස්ථාව, මෙරට විශ්වවිද්‍යාල සමඟ එකට එකතුව සැලැස්මකට ගමන් කළේ නම් මේ වන විට, මිල ගණන් ඉහළ වානේ ව්‍යාපෘති පිටරටට භාරදීමට සිදු නොවන බවත් ඔහු ප්‍රකාශ කළේය. කාර්මික විප්ලවය ජයගෙන තිබෙන්නේ, වානේ කර්මාන්තය පදනම් කරගත් රටවල් බවද ඔහු අවධාරණය කළේය.
සියලු දරුවන්ට, තාක්ෂණයේ දොරටු විවෘත කර දීම සඳහා දායක වියහැකි සෑම ක්ෂේත්‍රයක් ගැන ම, අධ්‍යාපන අමාත්‍යාංශයේ සැලැස්මට අන්තර්ගත කර ඇතැයිද, විශේෂයෙන් තොරතුරු තාක්ෂණය හදාරණ දරුවන්ට, රට ඩිජිටල්කරණයට විවෘත කරනවාත් සමඟම පන්ති කාමරයෙන් නොලැබෙන මහා දැනුමකට අවතීර්ණ වීමට හැකියාව ලැබෙන බවද ඔහු පැවසීය. එය රටේ සංවර්ධනයට හා දියුණුවට පරිවර්තනය කර ගන්නට හැකිවන බව, අධ්‍යාපන අමාත්‍ය දිනේෂ් ගුණවර්ධන මහතා සඳහන් කළේය.
