ටෙස්ලා (Tesla) සහ එක්ස් (X) සමාගම්හි හිමිකරු වන ඉලොන් මස්ක්, 2022 වසරේදී ට්විටර් සමාගම මිලදී ගැනීමේ ක්රියාවලියේදී එහි කොටස්කරුවන් සිතාමතාම නොමඟ යවා ඇති බවට සැන් ෆ්රැන්සිස්කෝ ෆෙඩරල් අධිකරණ ජූරි සභාව තීන්දු කර තිබේ. ඩොලර් බිලියන 44ක මෙම දැවැන්ත ගනුදෙනුව සිදුවන අතරතුර ඔහු විසින් කරන ලද ප්රකාශ සහ ට්විටර් පණිවිඩ හරහා සමාගමේ කොටස් මිල හිතාමතාම පහත දැමූ බවට අධිකරණය හමුවේ කරුණු තහවුරු වී ඇත.
ට්විටර් ගනුදෙනුව තාවකාලිකව නතර කර ඇති බවට ඔහු පළ කළ ට්විටර් පණිවිඩ ද ඇතුළුව ප්රකාශ දෙකක් මඟින් ආයෝජකයින් නොමඟ ගොස් ඇති බව ජූරි සභාව පිළිගෙන තිබේ. කෙසේ වෙතත් ඔහු සිතාමතාම වංචා සහගත “කුමන්ත්රණයක්” (Scheme) කළ බවට එල්ල වූ ඇතැම් බරපතල චෝදනාවලින් ඔහුව නිදහස් කිරීමට ද පියවර ගෙන ඇත.
දින 20කට අධික කාලයක් පැවති මෙම නඩු විභාගයෙන් අනතුරුව ආයෝජකයින්ට සිදු වූ හානිය වෙනුවෙන් එක් කොටසකට ඩොලර් 3 සිට 8 දක්වා වන්දියක් ගෙවන ලෙස නියම කර ඇති අතර එම සමස්ත වන්දි මුදල ඩොලර් බිලියන 2.1ක් පමණ වනු ඇතැයි ගණන් බලා තිබේ. මස්ක් අධිකරණය හමුවේ පවසා සිටියේ ට්විටර් පාලනාධිකාරිය එහි පවතින ව්යාජ ගිණුම් (Bots) ප්රමාණය පිළිබඳව තමාට අසත්ය ප්රකාශ කර ඇති බවයි.
වත්මන් ලෝක ආර්ථිකය තුළ ප්රබල බලපෑමක් ඇති කරන ඉලොන් මස්ක්ගේ ශුද්ධ වත්කම මේ වන විට ඩොලර් බිලියන 814ක් ලෙස ඇස්තමේන්තු කර ඇති අතර මෙම වන්දි මුදල ගෙවීමට සිදුවීම ඔහුගේ ව්යාපාරික කටයුතුවලට කෙසේ බලපානු ඇත්දැයි ආර්ථික විශේෂඥයන් විමසිල්ලෙන් පසුවේ.
