වෙනීසිය බියෙනාලේ කලා ප්රදර්ශනයේ රුසියානු මණ්ඩපය යළි විවෘත කිරීමට ගත් තීරණයට ප්රතිචාර වශයෙන් එම සංස්කෘතික ආයතනයට ලබාදෙන යුරෝ මිලියන 2ක අරමුදල් අත්හිටුවන බවට යුරෝපා කොමිසම අනතුරු අඟවා තිබේ. 2022 වසරේ සිට වසා දමා තිබූ රුසියානු මණ්ඩපය 2026 වසරේ ප්රදර්ශනය සඳහා යළි විවෘත කිරීමට ගත් මෙම පියවර, යුරෝපා සංගමය සහ ඉතාලි ආයතන අතර මෙන්ම ජෝර්ජියා මෙලෝනිගේ ඉතාලි රජය තුළ ද දැඩි මතභේදයට තුඩු දී ඇත.
යුරෝපා කොමිසමේ විධායක උප සභාපති හෙන්නා විර්ක්කුනෙන් සහ සංස්කෘතික කටයුතු පිළිබඳ කොමසාරිස් ග්ලෙන් මිකලෙෆ් විසින් බියෙනාලේ කළමනාකාරීත්වයේ මෙම තීරණය දැඩි ලෙස හෙළා දකින බව මීට පෙර නිවේදනය කර තිබුණි. පසුගිය සිකුරාදා (අප්රේල් 10) බියෙනාලේ සභාපති පියෙට්රැන්ජෙලෝ බුටෆුඕකෝ වෙත ලිපියක් යොමු කරමින් අධ්යාපන හා සංස්කෘතික විධායක ඒජන්සිය (EACEA) දන්වා ඇත්තේ, මෙම තීරණය සම්බන්ධයෙන් දින 30ක් ඇතුළත පැහැදිලි කිරීමක් ලබා දිය යුතු බවයි. නිසි පැහැදිලි කිරීමක් සිදු නොවුණහොත් 2028 දක්වා වෙන් කර තිබූ යුරෝ මිලියන 2ක ප්රදානය අහෝසි වීමේ අවදානමක් පවතින බව ද එහි සඳහන් වේ.
