යුරෝපා සංගමයේ රටවල ආරක්ෂක කටයුතු සහ යුද සූදානම ශක්තිමත් කිරීම සඳහා ලබා දෙන සහනදායී ණය වැඩසටහන යටතේ හංගේරියාව ඉදිරිපත් කළ මූල්ය ඉල්ලීම් අනුමත කිරීම යුරෝපා කොමිසම විසින් යළිත් වරක් ප්රතික්ෂේප කර තිබේ. රුසියාවෙන් එල්ල විය හැකි තර්ජනවලට මුහුණ දීම සඳහා හඳුන්වා දුන් ‘SAFE’ නමැති මෙම අඩු පොලී ණය ක්රමය සඳහා රටවල් 19ක් අයදුම් කර තිබූ අතර, ඉන් ප්රංශය සහ චෙක් ජනරජය ඉදිරිපත් කළ අවසන් සැලසුම් ද ඊයේ (2026 මාර්තු 25) අනුමත විය. ඒ අනුව, මෙම සුවිශේෂී මූල්ය ප්රතිලාභය මෙතෙක් හිමි නොවූ එකම යුරෝපා සංගම් සාමාජික රට බවට හංගේරියාව පත්ව ඇත.
යුරෝපා කොමිසමේ මෙම තීරණයත් සමඟ ප්රංශයට යුරෝ බිලියන 15ක සහ චෙක් ජනරජයට යුරෝ බිලියන 2ක ණය මුදල් අප්රේල් මාසයේ සිට ලබා ගැනීමට අවස්ථාව හිමි වේ. එහෙත් හංගේරියාව විසින් ඉල්ලා ඇති යුරෝ බිලියන 17.4ක දැවැන්ත ආරක්ෂක ණය සැලසුම සම්බන්ධයෙන් මෙතෙක් අවසන් තීරණයක් ගෙන නොමැති බවත්, ඒ පිළිබඳ විමර්ශන තවදුරටත් සිදුවන බවත් කොමිසම සඳහන් කළේය. මේ සම්බන්ධයෙන් හංගේරියාව නිල ලිපියක් මගින් කරුණු විමසා සිටියද, බ්රසල්ස් බලධාරීන් පවසන්නේ හංගේරියාවේ සැලසුම අනුමත කිරීමට තරම් තවමත් සුදුසු මට්ටමක නොමැති බවයි.
හංගේරියානු අගමැති වික්ටර් ඕර්බන් (Viktor Orbán) සහ යුරෝපා සංගමය අතර පවතින දේශපාලනික මතභේද මෙම අරමුදල් අත්හිටුවීමට ප්රධාන හේතුවක් වී ඇති බව දේශපාලන විචාරකයෝ පවසති. විශේෂයෙන්ම යුක්රේනය සඳහා යුරෝපා සංගමය ලබා දීමට සැලසුම් කර ඇති යුරෝ බිලියන 90ක මූල්ය ආධාර පැකේජය අගමැති ඕර්බන් විසින් දිගින් දිගටම අවහිර කිරීම මෙම ගැටුම තවදුරටත් උග්ර වීමට හේතු වී තිබේ. මෙම තත්ත්වය හමුවේ යුරෝපා සංගමය තුළ හංගේරියාව රාජ්යතාන්ත්රිකව හුදකලා වෙමින් පවතින බව පෙනෙන්නට තිබේ.
