ෆින්ලන්ත ජනාධිපති ඇලෙක්සැන්ඩර් ස්ටබ් (Alexander Stubb) මහතා සිව්දින නිල සංචාරයක් සඳහා ඊයේ (04) ඉන්දියාවට පැමිණියේය. ඉන්දීය අග්රාමාත්ය නරේන්ද්ර මෝදි මහතාගේ විශේෂ ආරාධනයකට අනුව සිදුවන මෙම සංචාරය එළඹෙන මාර්තු 07 වනදා දක්වා පැවැත්වේ. දෙරට අතර පවතින රාජ්යතාන්ත්රික හා ආර්ථික සබඳතා නව මානයකට ඔසවා තැබීම මෙම සංචාරයේ ප්රධාන අරමුණයි.
ජනාධිපති ස්ටබ් මහතා නවදිල්ලියේ පැවැත්වෙන 11 වැනි ‘රයිසිනා සංවාදය – 2026’ (Raisina Dialogue) හි ප්රධාන ආරාධිතයා සහ ප්රධාන දේශකයා ලෙස සහභාගී වීමට නියමිතව ඇත. මීට අමතරව ඔහු ඉන්දීය ව්යාපාරික ප්රජාව සමඟ පවත්වන “ඉන්දියා-ෆින්ලන්ත ව්යාපාරික සංවාදයට” ද එක්වනු ඇත. මෙම සංචාරය හරහා වෙළඳ, තාක්ෂණික සහ ආරක්ෂක ක්ෂේත්රවල ශක්තිමත් සහයෝගීතාවයක් ගොඩනැගීමට අපේක්ෂා කරන බව ෆින්ලන්ත ජනාධිපතිවරයා සිය ‘X’ ගිණුමේ සටහනක් තබමින් පවසා තිබේ.
දෙරටේ නායකයන් අතර පැවැත්වෙන ද්විපාර්ශ්වික සාකච්ඡාවලදී විශේෂයෙන්ම ද්විපාර්ශ්වික වෙළඳාම දෙගුණ කිරීම, අනාගත තාක්ෂණික සහයෝගීතාව, තිරසාර සංවර්ධනය සහ හරිත බලශක්තිය යන කරුණු පිළිබඳව අවධානය යොමු වනු ඇත. එසේම ඉන්දු – යුරෝපා සංගම් නිදහස් වෙළඳ ගිවිසුම (India-EU FTA) කඩිනම් කිරීම සම්බන්ධයෙන් ද මෙහිදී සාකච්ඡා කිරීමට නියමිතය. මැදපෙරදිග පවතින යුදමය වාතාවරණය හමුවේ ගෝලීය සැපයුම් දාමයන් සුරක්ෂිත කර ගැනීම සඳහා ආසියාව සහ යුරෝපය අතර පවතින මෙවැනි සබඳතා අතිශය තීරණාත්මක බව දේශපාලන විශ්ලේෂකයෝ පෙන්වා දෙති.
මෙම සංචාරය ඉන්දියාව සහ ෆින්ලන්තය අතර පවතින වසර 75කට අධික රාජ්යතාන්ත්රික සබඳතාවල තවත් එක් වැදගත් සන්ධිස්ථානයක් ලෙස සැලකේ. විශේෂයෙන්ම 6G තාක්ෂණය සහ ඩිජිටල්කරණය වැනි නවීන අංශවලින් ඉන්දියාවට ෆින්ලන්තයේ සහයෝගය ලබා ගැනීම කෙරෙහි ද මෙහිදී වැඩි අවධානයක් යොමු වනු ඇත.
