ඉන්දීය නාවික හමුදාවට (Indian Navy) අයත් අතිශය රහසිගත තොරතුරු පාකිස්තානය වෙත ලබා දීමේ සිද්ධියක් සම්බන්ධයෙන් කෙරෙන විමර්ශනවලට අදාළව සිව්වන සැකකරු ද අත්අඩංගුවට ගැනීමට කර්නාටක පොලිසිය සමත්ව තිබේ.
අත්අඩංගුවට ගත් සිව්වන සැකකරු බටහිර බෙංගාලයේ පදිංචි 21 හැවිරිදි අලිෆ් ඉස්ලාම් (Alif Islam) නැමැත්තෙකි. ඔහු කේරළයේ ඉඩුක්කි දිස්ත්රික්කයේ සැඟව සිටියදී අත්අඩංගුවට ගෙන ඇත. මීට පෙර 2025 වසරේදී ගුජරාටයේ සහ උත්තර ප්රදේශ්හි පුද්ගලයන් තිදෙනෙකු ද මෙම නඩුවට අදාළව අත්අඩංගුවට ගෙන තිබුණි.
මල්පේ (Malpe) වරායේ පිහිටි කොචින් නැව් තටාකාංගනයට (Cochin Shipyard) අනුබද්ධ ඒකකයක සේවය කළ පිරිසක් වට්ස්ඇප් (WhatsApp) සහ ෆේස්බුක් (Facebook) හරහා නාවික හමුදා නැව්වල හඳුනා ගැනීමේ අංක සහ තාක්ෂණික තොරතුරු පිටස්තර පුද්ගලයන්ට ලබා දී ඇති බවට චෝදනා එල්ල වී තිබේ. මෙම තොරතුරු හුවමාරුව මාස 18ක පමණ කාලයක් තිස්සේ සිදුව ඇති බව විමර්ශකයන් සැක කරයි.
සැකකරුවන් සෘජුවම පාකිස්තානයේ සිටින පුද්ගලයන් සමඟ සම්බන්ධතා පවත්වා ඇති බවට පොලිසිය සැක කරන අතර, ඒ පිටුපස විශාල ජාලයක් පවතින්නේද යන්න පිළිබඳව ඉන්දීය මධ්යම විමර්ශන ඒකක (Central Agencies) සමඟ එක්ව පරීක්ෂණ පවත්වයි. සැකකරුවන්ගේ බැංකු ගිණුම් සහ දුරකථන දත්ත මේ වන විට විශේෂ විශ්ලේෂණයකට ලක් කෙරේ.
ඉන්දීය නාවික හමුදාවේ ආරක්ෂාවට සෘජු බලපෑමක් එල්ල කළ හැකි මෙම තොරතුරු කාන්දුව සම්බන්ධයෙන් කර්නාටක පොලිසිය සහ ආරක්ෂක අංශ දැඩි අවධානයෙන් පසුවෙයි.
