ප්රංශයේ පැවැත්වීමට නියමිත නගර සභා මැතිවරණයේදී නව දත්ත මධ්යස්ථාන (Data Centres) ඉදිකිරීමේ ව්යාපෘතිවලට එරෙහිව දැඩි මහජන විරෝධයක් මතු වී තිබේ. විශේෂයෙන්ම පැරිස් නුවරට නුදුරු ලේ බෝර්ජේ (Le Bourget) වැනි ප්රදේශවල මැතිවරණයට ඉදිරිපත් වන අපේක්ෂකයන්, මෙම මධ්යස්ථාන මගින් පරිසර උෂ්ණත්වය ඉහළ යාම, ශබ්ද දූෂණය සහ ප්රදේශවාසීන්ට රැකියා උත්පාදනය නොවීම යන කරුණු මුල් කරගනිමින් සිය ප්රචාරණ කටයුතු මෙහෙයවමින් සිටිති.
ප්රංශ ජනාධිපති එම්මානුවෙල් මැක්රොන් කෘතිම බුද්ධි (AI) තාක්ෂණ තරගයෙන් ජයගැනීම සඳහා යුරෝ බිලියන 100කට අධික පෞද්ගලික ආයෝජන දත්ත මධ්යස්ථාන වෙත ආකර්ෂණය කර ගැනීමට උත්සාහ කළද, ප්රාදේශීය මට්ටමින් ඊට එල්ල වන බාධා වැඩි වෙමින් පවතී. විවේචකයන් පෙන්වා දෙන්නේ මෙම නවීන ‘කර්මාන්ත 4.0’ ව්යාපෘති මගින් සාමාන්ය ජනතාවට සෘජු ආර්ථික ප්රතිලාභ අත් නොවන අතර ඇමරිකානු තාක්ෂණික දැවැන්තයන්ගේ බලපෑම පමණක් ව්යාප්ත වන බවයි.
මාර්තු 15 සහ 22 යන දිනවල අදියර දෙකකින් පැවැත්වෙන මෙම මැතිවරණය, 2027 ජනාධිපතිවරණයට පෙර දේශපාලන පක්ෂවල ජනප්රියතාව මැන බැලීමේ තීරණාත්මක පරීක්ෂණයක් වනු ඇත. විදුලි බල පද්ධතියට එල්ල වන පීඩනය සහ විනිවිදභාවයකින් තොරව සිදුවන මෙම ව්යාපෘති නතර කරන බවට පොරොන්දු වන අපේක්ෂකයන් වෙත ජනතා අවධානය වැඩි වශයෙන් යොමු වෙමින් පවතින බව විදේශ වාර්තා සඳහන් කරයි.
