මෝටර් රථවල රියැදුරු ආරක්ෂාව වෙනුවෙන් සවිකර ඇති වායු බැලූනයක් (Airbag) පිපිරී යාම හේතුවෙන් මෙරට සිදුවූ දෙවන මරණය ගාල්ල ප්රදේශයෙන් වාර්තා වී තිබේ. මෙලෙස අවාසනාවන්ත ලෙස මියගොස් ඇත්තේ ගාල්ල රිච්මන්ඩ් විද්යාලයේ ආදි සිසුවකු වන 63 හැවිරිදි හේමසිරි රණවීර මහතාය. ඉකුත් ජනවාරි 31 වැනිදා ගාල්ල රිච්මන්ඩ් විද්යාලය අසලදී සිය මෝටර් රථය තාප්පයක ගැටීමෙන් ඔහු මෙම අනතුරට මුහුණ දී ඇත. අනතුර සිදුවන අවස්ථාවේදී වාහනය ඉතා අඩු වේගයකින් ධාවනය වී තිබුණද, වායු බැලූනය විවෘත වීමේදී සිදු වූ පිපිරීමකින් විසි වූ ලෝහමය කොටසක් ඔහුගේ මුහුණ පසාරු කරගෙන ගොස් සුෂුම්නාවට හානි කිරීම මරණයට සෘජු හේතුව වී ඇති බව පශ්චාත් මරණ පරීක්ෂණයේදී අනාවරණය වී තිබේ.
මෙම මරණය සම්බන්ධයෙන් කරාපිටිය ශික්ෂණ රෝහලේ අධිකරණ වෛද්ය නිලධාරිනී සසිනි නිරුදිකා ගමගේ මහත්මිය විසින් සිදුකළ දීර්ඝ විමර්ශනයකදී හෙළි වී ඇත්තේ, මියගිය පුද්ගලයාගේ සිරුරේ වෙනත් බරපතළ තුවාල නොතිබූ බවයි. වායු බැලූනය ඇතුළත තිබූ කුඩා ලෝහ කැබැල්ලක් හකු අස්ථි හරහා බෙල්ල පිටුපසට ගමන් කිරීම නිසා අධික රුධිර වහනයක් සිදුවී ඇති අතර, මෙය මෝටර් රථ ආරක්ෂණ පද්ධතියේ පවතින නිෂ්පාදන දෝෂයක් බව වෛද්ය වාර්තා මඟින් තහවුරු කර ඇත. මීට පෙර 2023 වසරේදී හොරණ ප්රදේශයේදී ද මෙවැනිම ආකාරයේ අනතුරකින් නැනෝ තාක්ෂණ ආයතනයේ විද්යාඥයකු වූ ආචාර්ය විමුක්ති ජයවීර මහතා මියගිය අතර, එය මෙරට වාර්තා වූ පළමු වායු බැලූන මරණයයි.
අදාළ වාහන නිෂ්පාදන සමාගම් විසින් දෝෂ සහිත වායු බැලූන සහිත වාහන නැවත කැඳවීමට මීට පෙර පියවර ගෙන තිබුණද, තවමත් එවැනි අනාරක්ෂිත වාහන මාර්ගවල ධාවනය වන බව මෙම අනතුරින් පැහැදිලි වන බව බලධාරීහු පෙන්වා දෙති. එබැවින් තමන් පදවන වාහනයේ වායු බැලූන පද්ධතිය නිෂ්පාදකයා විසින් සහතික කරන ලද ආරක්ෂිත තත්ත්වයේ පවතීදැයි වහාම පරීක්ෂා කර ගන්නා ලෙස අධිකරණ වෛද්ය විශේෂඥ පනීත සෙනෙවිරත්න මහතා ඇතුළු වෛද්ය කණ්ඩායම ජනතාවගෙන් ඉල්ලා සිටියි.
