ගාල්ලේ දිරිය ව්යවසායකයන්, නව නිපැයුම්කරුවන් සහ කුඩා කර්මාන්තකරුවන් දිරිගැන්වීම වෙනුවෙන් සංවිධානය කරනු ලබන ‘Galle Night Street Fair’ වැඩසටහන හෙට (07) සහ අනිද්දා (08) දෙදින පුරා ගාලු කොටු බැම්ම අසල බාලදක්ෂ මාවතේදී පැවැත්වීමට කටයුතු යොදා තිබේ. දකුණට ආවේණික සංස්කෘතික අනන්යතාවයන්ට මුල් තැන දෙමින් ක්රියාත්මක වන මෙම වැඩසටහන හරහා දේශීය හා විදේශීය සංචාරකයන්ට “නොනිදන නගරයක” අපූර්ව අත්දැකීමක් ලබා ගැනීමට අවස්ථාව උදා වේ.
මෙහිදී සංස්කෘතික සංදර්ශන, විචිත්රවත් විදුලි ආලෝක රටා සහ සජීවී සංගීත වැඩසටහන් රැසක් ඉදිරිපත් කිරීමට නියමිත අතර දකුණේ ප්රණීත ආහාර පාන රස විඳීමට ද අමුත්තන්ට අවස්ථාව හිමි වේ. විශේෂයෙන්ම ශ්රී ලංකාවට පැමිණෙන විදේශීය සංචාරකයන් ඉලක්ක කරගනිමින් සංචාරක ප්රවර්ධන වැඩසටහනක් ලෙස මෙය ක්රියාත්මක වන අතර, එය ගාල්ල දිස්ත්රික්කයේ ආර්ථික හා සංස්කෘතික පුනරුදයට මනා පිටුවහලක් වනු ඇතැයි සංවිධායකයෝ අපේක්ෂා කරති.
ගාල්ල දිස්ත්රික් ලේකම් කාර්යාලය, ගාල්ල දිස්ත්රික් ව්යවසාය සභාව, ගාල්ල දිස්ත්රික් කර්මාන්ත හා වාණිජ මණ්ඩලය සහ ගාල්ල මහ නගර සභාව ඇතුළු රාජ්ය හා පෞද්ගලික ආයතන රැසක ඒකාබද්ධ දායකත්වයෙන් මෙම දැවැන්ත වීදි වෙළෙඳ ප්රදර්ශනය සංවිධානය කර තිබේ.
