සෞඛ්ය අමාත්යාංශය විසින් වෛද්යවරුන්ගේ පශ්චාත් සීමාවාසික අනුයුක්ත කිරීම් සහ දුෂ්කර සේවා ස්ථාන මාරු ක්රියාවලිය තුළ සිදුකරන බව කියන අක්රමිකතාවලට එරෙහිව දැඩි වෘත්තීය සමිති ක්රියාමාර්ගයකට එළඹෙන බව රජයේ වෛද්ය නිලධාරීන්ගේ සංගමය (GMOA) නිවේදනය කරයි. එළඹෙන අඟහරුවාදා (2026.03.31) පෙරවරු 8.00ට පෙර අදාළ ගැටලුවලට විසඳුම් ලබා නොදුන්නහොත් මෙම තීරණය ක්රියාත්මක කරන බව එම සංගමය අවධාරණය කර සිටී. මීට පෙර පැවති දුෂ්කර සේවා ස්ථාන 393කින් සමන්විත ලැයිස්තුව කිසිදු විද්යාත්මක පදනමකින් තොරව ස්ථාන 265 දක්වා අඩු කිරීමට අමාත්යාංශය කටයුතු කර ඇති බවත්, එමඟින් පර්යන්ත රෝහල්වල සේවය කරන වෛද්යවරුන් දිරිගැන්වීම සඳහා ලබාදී තිබූ වරප්රසාද අහිමි වී ඇති බවත් සංගමය පෙන්වා දෙයි.
රජයේ “ආරෝග්යා” ව්යාපෘතිය හුදු දේශපාලන සංදර්ශනයක් බවට චෝදනා කරන වෛද්ය සංගමය, කළමනාකරණ සේවා කොමිෂන් සභාවේ අනුමැතියකින් තොරව එම ව්යාපෘතිය සඳහා වෛද්යවරුන් අනුයුක්ත කිරීම හරහා පවතින රෝහල් පද්ධතිය තුළ දැඩි වෛද්ය හිඟයක් නිර්මාණය වී ඇති බව පවසයි. වෛද්යවරුන් පර්යන්ත රෝහල්වල සේවය කිරීම සඳහා යොමු කරවා ගැනීමට තිබූ “විශේෂ දුෂ්කර සේවා ස්ථාන මාරු” ක්රමය අත්තනෝමතික ලෙස වෙනස් කිරීම නිසා ඉදිරියේදී දුෂ්කර ප්රදේශවල රෝහල් වැසී යාමේ තර්ජනයක් පවතින බව ද ඔවුහු පෙන්වා දෙති. දේශපාලන වුවමනාවන් මත රාජ්ය සේවා කොමිෂන් සභාවේ ස්වාධීනත්වය උල්ලංඝනය කරමින් ගනු ලබන මෙම තීරණ වහාම නිවැරදි කළ යුතු බව වෛද්ය සංගමය රජයට අවධාරණය කර සිටී.
