දකුණු අප්රිකාවෙන් ආනයනය කරන ලද ගල්අඟුරු තොගවල ප්රමිතිය අසමත් වීම හේතුවෙන් ඉදිරි මාස කිහිපය තුළ මෙරට දරුණු විදුලි අර්බුදයක් ඇතිවීමේ අවදානමක් මතුව ඇතැයි වාර්තා වේ. ඉන්දියාවේ ‘ට්රයිඩන්ට් කෙම්ෆාර්’ සමාගම හරහා ගෙන්වන ලද මෙම ගල්අඟුරු තොගවල අන්තර්ගත ‘දළ කැලරි අගය’ (GCV) නොරොච්චෝල බලාගාරයේ යන්ත්ර ක්රියාත්මක කිරීමට අවශ්ය මට්ටමට වඩා බෙහෙවින් අඩු බව හෙළි වී තිබේ. මේ සම්බන්ධයෙන් ගත හැකි නීතිමය ක්රියාමාර්ග සහ ටෙන්ඩර් කොන්දේසි වෙනස් කිරීම පිළිබඳව රජය මේ වන විට නීතිපතිවරයාගේ උපදෙස් පැතීමට තීරණය කර ඇත.
ප්රමිතියෙන් තොර මෙම ගල්අඟුරු භාවිතය නිසා බලාගාරයේ ජනන යන්ත්රවලට හානි සිදුවීමේ තර්ජනයක් පවතින බවත්, එය ජාතික විදුලි පද්ධතියේ ස්ථාවරත්වයට දැඩි බලපෑමක් එල්ල කරන බවත් බලශක්ති විශේෂඥයෝ අනතුරු අඟවති. මේ වන විට අදාළ ටෙන්ඩරය යටතේ ගල්අඟුරු නැව්ගත කිරීම් 23ක් මෙරටට ගෙන්වා ඇති අතර, ඉන් නැව්ගත කිරීම් තුනකින් ලබාගත් සාම්පල පරීක්ෂණවලින් අසමත් වී ඇති බව නොරොච්චෝල බලාගාර අභ්යන්තර වාර්තා සනාථ කරයි. සම්පූර්ණ ටෙන්ඩර් ක්රියාවලිය දූෂිත බවට එල්ල වන චෝදනා හමුවේ ඉදිරි පියවර ගැනීම රජයේ අරමුණයි.
