වසර ගණනාවක් පුරා පවතින හම්බන්තොට වනඅලි කළමනාකරණ කලාපයේ පරිපාලනමය ගැටලු විසඳීම සඳහා නව රෙගුලාසි මාලාවක් ඇතුළත් ගැසට් පත්රය මේ වන විට සකස් කර අවසන් බව නීතිපතිවරයා අද (16) ශ්රේෂ්ඨාධිකරණයට නිල වශයෙන් දැනුම් දුන්නේය. පරිසර යුක්ති කේන්ද්රය සහ වල්සපුගල ප්රදේශවාසීන් විසින් ගොනු කරන ලද මූලික අයිතිවාසිකම් පෙත්සමක් අද කැඳවූ අවස්ථාවේදී රජයේ නියෝජ්ය සොලිසිටර් ජෙනරාල්වරිය මෙම කරුණු අනාවරණය කළාය.
මෙම නව රෙගුලාසි මාලාව මගින් අදාළ කලාපය තුළ සිදුකළ හැකි සහ නොහැකි ක්රියාකාරකම් පැහැදිලිව දක්වා ඇති අතර, එමගින් වනඅලි ගැටලුවට තිරසාර විසඳුමක් ලැබෙනු ඇතැයි අපේක්ෂා කෙරේ. පෙත්සම්කාර පාර්ශ්වය වෙනුවෙන් පෙනී සිටි නීතිඥ රවීන්ද්රනාත් දාබරේ මහතා ඉල්ලා සිටියේ අදාළ රෙගුලාසි අධ්යයනය කිරීමට කාලය ලබාදෙන ලෙසයි. ඒ අනුව, කරුණු දැක්වීම සඳහා පෙත්සම්කරුවන්ට අවසර ලබාදුන් ශ්රේෂ්ඨාධිකරණය, නඩුව යළි සැප්තැම්බර් මස 14 වනදා කැඳවීමට නියම කළේය.
හම්බන්තොට ප්රදේශයේ සීග්ර සංවර්ධනය හමුවේ වනඅලි වාසස්ථාන අහිමි වීම නිසා වසර ගණනාවක් පුරා මෙම කළමනාකරණ කලාපය විධිමත් ලෙස ක්රියාත්මක කරන ලෙස ඉල්ලා ප්රදේශවාසීන් විවිධ විරෝධතාවල නිරත විය. 2021 වසරේදී මෙම කලාපය ගැසට් මගින් ප්රකාශයට පත් කළ ද, ඊට අදාළ නිසි රෙගුලාසි පැනවීම මෙතෙක් ප්රමාද වී තිබුණි.
