මැදපෙරදිග කලාපයේ පවතින උග්ර දේශපාලනික නොසන්සුන්තාව හමුවේ ශ්රී ලංකාවේ ආර්ථික වර්ධනයට නැවතත් අවහිරතා මතුවිය හැකි බව ජාත්යන්තර මූල්ය අරමුදල (IMF) අනතුරු අඟවයි. විශේෂයෙන්ම බලශක්ති මිල ඉහළ යාම, සංචාරක පැමිණීම්වල සිදුවන වෙනස්කම් සහ විදේශ රැකියා ක්ෂේත්රය යන ප්රධාන අංශ තුන හරහා ශ්රී ලංකාව මෙම ගෝලීය අර්බුදයට සෘජුවම නිරාවරණය වී ඇති බව මූල්ය අරමුදලේ ශ්රී ලංකා මෙහෙයුම් ප්රධානී ඉවාන් පපජෝර්ජියෝ මහතා පෙන්වා දෙයි. පවතින තත්ත්වය හමුවේ මෙරට ආර්ථික වර්ධන පුරෝකථනයන් නැවත සමාලෝචනය කිරීමට සිදුවන බවත්, ඉන්ධන මිල ඉහළ යාම සහ ගුවන් ගමන් බාධා හරහා දේශීය පීඩනයන් දැනටමත් වර්ධනය වෙමින් පවතින බවත් එම සංවිධානය සඳහන් කරයි.
මෙම අභියෝග මධ්යයේ වුවද, ශ්රී ලංකාව සහ ජාත්යන්තර මූල්ය අරමුදල අතර සිව් අවුරුදු විස්තීර්ණ අරමුදල් පහසුකම (EFF) යටතේ පස්වන සහ හයවන සමාලෝචන සම්බන්ධයෙන් කාර්ය මණ්ඩල මට්ටමේ එකඟතාවයකට (Staff-level agreement) එළැඹීමට හැකි වී තිබේ. මෙය මූල්ය අරමුදලේ විධායක මණ්ඩල අනුමැතියට යටත්ව ක්රියාත්මක වන අතර, එම අනුමැතිය ලැබුණු පසු ශ්රී ලංකාවට තවත් ඇමරිකානු ඩොලර් මිලියන 700ක පමණ වාරිකයක් ලබා ගැනීමට අවස්ථාව හිමි වනු ඇත. ඒ අනුව මෙම වැඩසටහන යටතේ ශ්රී ලංකාව ලබා ගන්නා මුළු මුදල ඩොලර් බිලියන 2.4ක් දක්වා ඉහළ යනු ඇතැයි අපේක්ෂා කෙරේ.
2025 වසරේදී ශ්රී ලංකා ආර්ථිකය සියයට 5ක ශක්තිමත් වර්ධනයක් අත්කර ගත් අතර 2026 මාර්තු අවසානය වන විට මෙරට නිල විදේශ සංචිත ප්රමාණය ඩොලර් බිලියන 7ක් දක්වා වර්ධනය වී තිබේ. කෙසේ වෙතත්, මැදපෙරදිග අර්බුදය මෙන්ම ‘ඩිට්වා’ සුළි කුණාටුව වැනි දේශගුණික විපර්යාස නිසා ඇති වූ බලපෑම් හමුවේ ආර්ථික ස්ථායීතාවය ආරක්ෂා කර ගැනීම සඳහා ප්රතිසංස්කරණ ක්රියාවලිය තවදුරටත් වේගවත් කළ යුතු බව මූල්ය අරමුදල අවධාරණය කරයි. විශේෂයෙන් බලශක්ති මිල පිරිවැය ආවරණය වන පරිදි පවත්වා ගැනීම, බදු ආදායම් කළමනාකරණය සහ මූල්ය ක්ෂේත්රයේ දුර්වලතා මඟහරවා ගැනීම කෙරෙහි රජයේ දැඩි අවධානය යොමු විය යුතු බව ද ඔවුන් පෙන්වා දෙයි.
