2026 විස්සයි විස්ස ලෝක කුසලාන තරඟාවලියේ වඩාත් අවධානය දිනාගත් ඉන්දියාව සහ පාකිස්ථානය අතර මහා තරඟය හෙට (පෙබරවාරි 15) රාත්රී 7:00 ට කොළඹ ආර්. ප්රේමදාස ක්රීඩාංගණයේදී ආරම්භ වීමට නියමිතයි. මෙම තීරණාත්මක තරඟයට පෙර දෙරටේ නායකයින්ගේ සහභාගිත්වයෙන් පැවැති මාධ්ය හමුවේදී, දෙරට අතර පවතින දේශපාලන නොසන්සුන්තාවය හේතුවෙන් ක්රීඩකයින් එකිනෙකාට අතට අත නොදීමේ (Handshake) සිරිත පිළිබඳව මාධ්යවේදීන් ප්රශ්න කර සිටියහ.
එහිදී අදහස් දැක්වූ ඉන්දීය නායක සූර්යකුමාර් යාදව් පවසා සිටියේ තමන් කොළඹට පැමිණ සිටින්නේ හොඳින් ක්රිකට් ක්රීඩා කිරීමට බවයි. අතට අත දීම සම්බන්ධයෙන් ගනු ලබන තීරණය දැන ගැනීමට තවත් පැය 24ක්, එනම් තරඟය අවසන් වන තෙක් ඉවසා සිටින ලෙස ඔහු වැඩිදුරටත් සඳහන් කළේය. මීට පෙර 2025 ආසියානු කුසලාන තරඟයකදී ද ඉන්දීය කණ්ඩායම පාකිස්ථාන ක්රීඩකයින් සමඟ අතට අත දීම ප්රතික්ෂේප කර තිබූ අතර, එවකට සූර්යකුමාර් යාදව් ප්රකාශ කර තිබුණේ එය සමස්ත කණ්ඩායමේම තීරණයක් බවයි.
කොළඹ ආර්. ප්රේමදාස ක්රීඩාංගණයේ මන්දගාමී සහ පිතිකරුවන්ට අභියෝගාත්මක තණතීරුවක පැවැත්වෙන මෙම තරඟයේදී දඟ පන්දු යවන්නන් ප්රධාන භූමිකාවක් ඉටු කරනු ඇතැයි පාකිස්ථාන නායක සල්මන් අලි අගා ද මාධ්ය හමුවේදී ඉඟි පළ කර තිබේ. බංග්ලාදේශයට සහය පළ කරමින් මෙම තරඟය වර්ජනය කිරීමට පාකිස්ථානය මීට පෙර සැලසුම් කර තිබුණද, ශ්රී ලංකාවේ රාජ්යතාන්ත්රික මැදිහත්වීම මත තරඟය සැලසුම් කළ පරිදිම පැවැත්වීමට කටයුතු යොදා ඇත.
