වත්මන් බලශක්ති අමාත්ය කුමාර ජයකොඩි මහතාට එරෙහිව අල්ලස් හෝ දූෂණ චෝදනා විමර්ශන කොමිෂන් සභාව විසින් කොළඹ මහාධිකරණය හමුවේ අද (07) අධිචෝදනා ගොනු කර තිබේ. මීට වසර 10කට පෙර, එනම් 2016 වසරේදී ඔහු ලංකා පොහොර සමාගමේ ප්රසම්පාදන කළමනාකරු ලෙස කටයුතු කරමින් සිටියදී, රජයට රුපියල් 8,859,708ක (ලක්ෂ 88කට අධික) පාඩුවක් සිදුකළ බවට මෙමඟින් චෝදනා එල්ල වී ඇත. අල්ලස් හෝ දූෂණ චෝදනා පනතේ 70 වැනි වගන්තිය යටතේ එන ‘දූෂණය’ නමැති වරද ඔහු විසින් සිදුකර ඇති බව කොමිසම පෙන්වා දෙයි.
අදාළ චෝදනාවට අනුව, ලංකා පොහොර සමාගමේ ගබඩා පරිශ්රයේ කාපට් ඇතිරීමේ කොන්ත්රාත්තුවක් පෞද්ගලික සමාගමකට අයුතු වාසි සැලසෙන අයුරින් ලබාදීම හරහා මෙම මූල්ය අක්රමිකතාව සිදුව තිබේ. ප්රසම්පාදන ක්රියාවලිය උල්ලංඝනය කරමින් රජයේ මුදල් අවභාවිත කළ බවට එල්ල වී ඇති මෙම අධිචෝදනා පත්රය අද මහාධිකරණය වෙත භාර දී ඇත. වත්මන් රජයේ අමාත්යවරයෙකුට එරෙහිව මෙලෙස පැරණි දූෂණ චෝදනාවක් සම්බන්ධයෙන් නඩු පැවරීම දේශපාලන ක්ෂේත්රය තුළ දැඩි කතාබහකට ලක්වෙමින් පවතී.
