ශක ගණනාවක් පුරා පවතින න්යෂ්ටික ආරවුල විසඳා ගැනීමේ අරමුණින් එක්සත් ජනපදය සහ ඉරානය අතර වක්ර සාකච්ඡා අද (17) ජිනීවාහිදී ආරම්භ විය. ඕමානයේ මැදිහත්වීමෙන් සිදුවන මෙම සාකච්ඡා සඳහා ඇමරිකානු ජනාධිපතිවරයාගේ විශේෂ නියෝජිතයන් ලෙස ස්ටීව් විට්කොෆ් සහ ජරෙඩ් කුෂ්නර් සහභාගී වන බව ඉරාන විදේශ අමාත්ය අබ්බාස් අරක්චි තහවුරු කර තිබේ.
මෙම රාජ්ය තාන්ත්රික හමුව සිදුවන්නේ කලාපය තුළ දැඩි යුදකාමී වාතාවරණයක් නිර්මාණය වී ඇති පසුබිමකය. ජිනීවා සාකච්ඡා පිළිබඳව අදහස් දක්වමින් ඇමරිකානු ජනාධිපති ඩොනල්ඩ් ට්රම්ප් සඳහන් කළේ ඉරානය සිය න්යෂ්ටික වැඩසටහන සම්බන්ධයෙන් එකඟතාවයකට පැමිණෙනු ඇතැයි තමා විශ්වාස කරන බවයි. එසේ නොමැති වුවහොත් ඉරානයේ න්යෂ්ටික මධ්යස්ථාන ඉලක්ක කර B-2 බෝම්බ හෙලන යානා මගින් ප්රහාර එල්ල කිරීමට සිදුවන බවටද ඔහු අනතුරු ඇඟවීය.
පසුගිය ජුනි මාසයේදී ඊශ්රායලය සහ එක්සත් ජනපදය ඉරානයේ න්යෂ්ටික ඉලක්ක වෙත ප්රහාර එල්ල කිරීමෙන් පසු ටෙහෙරානය යුරේනියම් පොහොසත් කිරීමේ ක්රියාකාරකම් නතර කර ඇති බව පවසා ඇතත්, ජාත්යන්තර සම්බාධක ඉවත් කර ගැනීම සඳහා මෙම සාකච්ඡා ඔවුන්ට තීරණාත්මක වී තිබේ. කෙසේ වෙතත්, තම මිසයිල වැඩසටහන පිළිබඳව සාකච්ඡා කිරීමට ඉරානය මෙතෙක් කැමැත්ත පළ කර නොමැත.
මේ අතර, ඉරානය විසින් හෝමූස් සමුද්ර සන්ධියේ හමුදා අභ්යාසයක් ආරම්භ කර ඇති අතර, ඉරානයට එරෙහිව සති ගණනාවක මෙහෙයුමක් සඳහා එක්සත් ජනපද හමුදාවද සූදානමින් සිටින බව රොයිටර් පුවත් සේවය වාර්තා කරයි. ජිනීවා සාකච්ඡාවලට සමගාමීව රුසියා – යුක්රේන යුද්ධය අවසන් කිරීමේ ත්රෛපාර්ශ්වික සාකච්ඡා සඳහාද ඇමරිකානු නියෝජිතයන් සහභාගී වීමට නියමිතය.
