ඉරාන උත්තරීතර නායකයාගේ අභාවයෙන් පසු ආරම්භ වූ ‘ඔපරේෂන් එපික් ෆියුරි’ (Operation Epic Fury) මෙහෙයුමේ දරුණුතම ප්රහාර මාලාවට ගල්ෆ් කලාපයේ රටවල් කිහිපයක් අද (01) මුහුණ දී තිබේ. ඉරාන විප්ලවීය ආරක්ෂක බලකාය (IRGC) විසින් එක්සත් අරාබි එමීර් රාජ්යය (UAE) ඉලක්ක කරගනිමින් පමණක් මිසයිල 137ක් සහ ඩ්රෝන යානා 209ක් මුදාහැර ඇති බව ආරක්ෂක වාර්තා තහවුරු කරයි. මෙම සංඛ්යාව ඉරානය විසින් මීට පෙර ඊශ්රායලය වෙත එල්ල කළ ප්රහාරවලට සමාන මට්ටමක පැවතීම විශේෂත්වයක් වන අතර, එමඟින් ගල්ෆ් කලාපය කෙරෙහි ඉරානයේ පවතින දැඩි විරෝධය මනාව පැහැදිලි වේ.
මීට අමතරව කටාර් රාජ්යය වෙත මිසයිල 66ක් ද, බහරේනය වෙත මිසයිල 45ක් සහ ඩ්රෝන යානා 9ක් ද එල්ල කර තිබේ. මෙම ප්රහාරවලින් බහුතරයක් ඇමරිකානු සහ එමීර් රාජ්යයේ මිසයිල ආරක්ෂණ පද්ධති (THAAD සහ Patriot) මගින් සාර්ථකව විනාශ කිරීමට සමත් වුවද, එල්ල කර ඇති ආයුධ ප්රමාණය අතිමහත් බැවින් කලාපීය ආරක්ෂාව පිළිබඳ දැඩි අවදානමක් මතුව ඇත. විශේෂයෙන්ම බහරේනයේ පිහිටි ඇමරිකානු පස්වැනි නාවික බලඇණි මූලස්ථානය සහ කටාර්හි අල්-උඩෙයිඩ් (Al-Udeid) ගුවන් කඳවුර මෙම ප්රහාරවල ප්රධාන ඉලක්ක වී ඇති බව ජාත්යන්තර පුවත් සේවා වාර්තා කරයි.
