මැදපෙරදිග කලාපයේ උණුසුම් තත්ත්වය තවදුරටත් වර්ධනය කරමින්, අද (11) අලුයම සිට ගල්ෆ් කලාපයේ රටවල් ඉලක්ක කරගනිමින් ඉරානය විසින් දැවැන්ත මිසයිල සහ ඩ්රෝන ප්රහාර මාලාවක් එල්ල කර තිබේ. එක්සත් අරාබි එමීර් රාජ්යය, සෞදි අරාබිය සහ බහරේනය යන රටවල් මෙම ප්රහාරවලට මුහුණ දී ඇති අතර, ඉරානයෙන් එල්ල වන තර්ජන හමුවේ තම ගුවන් ආරක්ෂක පද්ධති ක්රියාත්මක වෙමින් පවතින බව එම රටවල ආරක්ෂක අමාත්යාංශ තහවුරු කරයි. ඉරාන විප්ලවීය ආරක්ෂක බලකාය ප්රකාශ කර ඇත්තේ අමෙරිකානු කඳවුරු සහ ඊශ්රායලය ඉලක්ක කර ගනිමින් මෙම අඛණ්ඩ ප්රහාර මාලාව දියත් කළ බවයි.
මෙම ප්රහාරයන්හිදී සෞදි අරාබියට අයත් ප්රින්ස් සුල්තාන් ගුවන් හමුදා කඳවුර දෙසට එල්ල වූ බැලස්ටික් මිසයිල හයක් සහ ෂෙයිබා (Shaybah) තෙල් නිධිය ඉලක්ක කරගත් අවි ආයුධ සාර්ථකව විනාශ කිරීමට සෞදි ආරක්ෂක අංශ සමත්ව තිබේ. මේ අතර එක්සත් අරාබි එමීර් රාජ්යය සහ බහරේනය සිය වැසියන්ට ආරක්ෂිත ස්ථාන කරා යන ලෙසත්, අනතුරු ඇඟවීමේ සිරේන් නාදයන් කෙරෙහි අවධානයෙන් පසුවන ලෙසත් හදිසි නිවේදන නිකුත් කර ඇත. ගෝලීය බලශක්ති සැපයුමට තීරණාත්මක බලපෑමක් එල්ල කළ හැකි මෙම යුදමය වාතාවරණය හමුවේ, කලාපීය ආරක්ෂාව පිළිබඳව ලෝක ප්රජාව දැඩි අවධානයෙන් පසුවෙයි.
