ඉරානය සහ ඊශ්රායල-ඇමරිකානු ඒකාබද්ධ බලකාය අතර පවතින දරුණු යුදමය ගැටුම් මාලාවත් සමඟ ඉරානය සතු මිසයිල බලය පිළිබඳව ලෝක අවධානය යොමුව තිබේ. අබුඩාබි, දෝහා සහ රියාද් යන නගර ඉලක්ක කර ගනිමින් ඉරානය අද (28) එල්ල කළ ප්රහාරයන්ට පදනම් වූ ඔවුන්ගේ මිසයිල අවි ගබඩාව පිළිබඳ ප්රධාන තොරතුරු කිහිපයක් මෙසේය.
ඉරානය සතු ‘ඛෝරම්ෂහාර් 4’ (Khorramshahr 4) වැනි බැලස්ටික් මිසයිල කිලෝමීටර් 2,000ක දුර විහිදීමේ හැකියාවෙන් යුක්ත වන අතර, ඒවාට ඊශ්රායලයේ ඕනෑම ස්ථානයකට ප්රහාර එල්ල කිරීමේ හැකියාව පවතී. මෙම මිසයිල ගුවන් ආරක්ෂක පද්ධති මගින් විනාශ කළ හැකි වුවද, ඒවා නගර මතට කඩා වැටීමෙන් ඇති වන මනෝවිද්යාත්මක භීතිය සහ සිවිල් හානිය දේශපාලන නායකත්වයට විශාල බලපෑමක් එල්ල කරයි.
ඉරානය සතු නිශ්චිත මිසයිල සංඛ්යාව පිළිබඳව පැහැදිලි දත්තයක් නොමැති අතර, එම මිසයිල බොහොමයක් රට පුරා විසිරී ඇති භූගත ගබඩාවල (Underground Silos) තැන්පත් කර තිබේ. ඇමරිකාව හෝ ඊශ්රායලය එල්ල කරන ගුවන් ප්රහාරවලින් ඒවා ආරක්ෂා කර ගැනීම සඳහා මෙම රහසිගත ක්රමවේදය අනුගමනය කරනු ලබයි.
2022 වසරේදී ඇමරිකානු මධ්යම අණදෙන මූලස්ථානය (CENTCOM) තක්සේරු කළ පරිදි ඉරානය සතුව විවිධ වර්ගයේ බැලස්ටික් සහ කෲස් මිසයිල 3,000ක් පමණ තිබුණි. ආරක්ෂක විශ්ලේෂකයන් වර්තමාන ගැටුම්වලදී ඉරාන බලය තක්සේරු කිරීම සඳහා පදනම් කරගනු ලබන්නේ මෙම දත්තයන්ය.
පසුගිය 2024 සහ 2025 වසරවල ඊශ්රායලයට එල්ල කළ මහා පරිමාණ ප්රහාරයන් හේතුවෙන් ඉරානයේ මිසයිල තොගය සැලකිය යුතු ලෙස අඩු වී ඇති බව විශ්වාස කෙරේ. කෙසේ වෙතත්, ඉරානය විසින් සිය අවි නිෂ්පාදනය අඛණ්ඩව සිදුකරන බැවින් වර්තමානයේ ඔවුන් සතු නිශ්චිත සංඛ්යාව තවමත් රහසකි.
ප්රධාන ආරක්ෂක පර්යේෂණ ආයතනවල දත්තයන්ට අනුව ඉරානය සතුව දැනට මිසයිල 1,500ක් පමණ ඉතිරිව පවතින බවට අනුමාන කෙරේ. එම මිසයිල විදීම සඳහා භාවිතා කරන ලොන්චර් (Launchers) සංඛ්යාව 100ත් 350ත් අතර පවතින බවට විශ්වාස කරන නමුත් ඒ පිළිබඳව ද නිශ්චිත තොරතුරු අනාවරණය වී නොමැති වීම ආරක්ෂක අංශවල දැඩි අවධානයට ලක්ව තිබේ.
