ඉරානයේ උත්තරීතර නායක මොජ්තාබා ඛමේනි (Mojtaba Khamenei) විසින් “ඇමරිකානු-සයොනිස්ට් ආක්රමණය” හේතුවෙන් විනාශ වූ රටේ යටිතල පහසුකම් සහ පරිසරය යළි ගොඩනැගීම සඳහා දැවැන්ත ජාතික මෙහෙයුමක් ආරම්භ කරන ලෙස එරට ජනතාවගෙන් ඉල්ලා සිටී. ඉස්ලාමීය ජනරජ දිනය සහ ජාතික සොබාදහම් දිනය නිමිත්තෙන් විශේෂ ප්රකාශයක් කරමින් ඔහු අවධාරණය කළේ, සතුරා ඉරානයේ වැසියන් පමණක් නොව එරට ස්වභාවික පරිසරය පවා ඉලක්ක කර ප්රහාර එල්ල කර ඇති බවයි.
පසුගිය පෙබරවාරි 28 වැනිදා ආරම්භ වූ මෙම යුද්ධයෙන් ජීවිත අහිමි වූවන් සිහිපත් කළ උත්තරීතර නායකයා, දකුණු දිග මිනාබ් (Minab) නගරයේ දැරියන්ගේ පාසලකට එල්ල වූ ප්රහාරය පිළිබඳව දැඩි සංවේගය පළ කළේය. එම ප්රහාරයෙන් පාසල් දැරියන් 186 දෙනෙකු ජීවිතක්ෂයට පත් වූ අතර, ඔවුන් සිහිපත් කිරීම වෙනුවෙන් රට පුරා රුක් රෝපණ වැඩසටහනක් (Tree-planting initiative) ක්රියාත්මක කරන ලෙස ඔහු ජනතාවගෙන් ඉල්ලා සිටියේය. “මියගිය දරුවන් වෙනුවෙන් රෝපණය කරන සෑම පැළයක්ම අනාගතයේදී සෞභාග්යයේ සංකේතයක් වනු ඇති” බව ඔහු පවසා තිබේ.
යුදමය වාතාවරණය හමුවේ වුවද ඉරාන වැසියන් සිය අභිමානය සහ ස්ථාවරත්වය ආරක්ෂා කරගෙන ඇති බවත්, රටේ දීප්තිමත් අනාගතය වෙනුවෙන් කැපවීම සෑම පුරවැසියෙකුගේම වගකීමක් බවත් ඔහු වැඩිදුරටත් සඳහන් කළේය. ඇමරිකානු ප්රහාරවලින් පසුබට නොවී රටේ සංවර්ධන කටයුතු පුළුල් කිරීම සතුරාට ලබා දෙන ප්රබලතම පිළිතුර වනු ඇති බව ඛමේනිගේ අදහසයි. මේ වන විට ඉරානය පුරා මෙම යළි ගොඩනැඟීමේ මෙහෙයුම සඳහා ජනතාව ඒකරාශී වෙමින් පවතින බව වාර්තා වේ.
