ඉරානය සමඟ පවතින යුදමය වාතාවරණය හේතුවෙන් ලෝක වෙළඳපොළේ තෙල් මිල ඉහළ යාම තාවකාලික තත්ත්වයක් බවත්, ඉරානයේ න්යෂ්ටික තර්ජනය අවසන් වූ වහාම මිල සීඝ්රයෙන් පහත වැටෙනු ඇති බවත් අමෙරිකානු ජනාධිපති ඩොනල්ඩ් ට්රම්ප් ප්රකාශ කරයි. නොවැම්බර් මාසයේ පැවැත්වෙන අමෙරිකානු මැදිකාලීන මැතිවරණය ඉලක්ක කරගනිමින් සිය ‘ටෘෘත් සෝෂල්’ (Truth Social) ගිණුමේ සටහනක් තබමින් ඔහු අවධාරණය කළේ, ලෝක සාමය වෙනුවෙන් සිදුකළ යුතු මෙම “සුළු මූල්යමය කැපකිරීම” ගැන වෙනස් අයුරින් සිතන්නේ අඥානයන් පමණක් බවයි.
ඉරානය සතු 60%කට වඩා පිරිපහදු කළ යුරේනියම් තොග අත්පත් කරගැනීම සඳහා විශේෂ බලකායන් යෙදවීමට ට්රම්ප් සලකා බලමින් සිටින අතර, ඉරානය කොන්දේසි විරහිතව යටත් වන තුරු ප්රහාර නතර නොකරන බව ඔහු පවසයි. කෙසේ වෙතත්, අමෙරිකානු ගොඩබිම් හමුදා මැදපෙරදිගට යෙදවීම සම්බන්ධයෙන් අමෙරිකානු ජනතාව තුළ දැඩි අකමැත්තක් පවතින බව නවතම ජනමත සමීක්ෂණ මගින් පෙනී යයි. එසේම, ඉරානයේ මිනාබ් නුවර පාසලකට එල්ල වූ ප්රහාරයකින් දැරියන් 168 දෙනෙකු මියයාමේ වගකීම ට්රම්ප් ප්රතික්ෂේප කළද, එය අමෙරිකානු-ඊශ්රායල ප්රහාරයක් බවට රොයිටර්ස් පුවත් සේවය මීට පෙර වාර්තා කළේය. යුද්ධය අවසන් කරන දිනය ඊශ්රායල අග්රාමාත්ය බෙන්ජමින් නෙතන්යාහු සමඟ සාකච්ඡා කර තීරණය කරන බව ද ට්රම්ප් වැඩිදුරටත් සඳහන් කර තිබේ.
