පෙබරවාරි 28 වැනිදා ආරම්භ වූ දරුණු යුදමය වාතාවරණය හමුවේ මේ වන විට ඉරානය තුළ පුද්ගලයන් මිලියන 3.2කට අධික සංඛ්යාවක් අවතැන් වී ඇති බව එක්සත් ජාතීන්ගේ සරණාගතයන් පිළිබඳ මහ කොමසාරිස් කාර්යාලය (UNHCR) බ්රහස්පතින්දා නිවේදනය කළේය. ගැටුම් තවදුරටත් උග්ර වීමත් සමඟ මෙම සංඛ්යාව ඉදිරි දිනවලදී තවත් ඉහළ යා හැකි බවත්, එමගින් බරපතල මානුෂීය අර්බුදයක් නිර්මාණය වෙමින් පවතින බවත් එම සංවිධානය අනතුරු අඟවයි.
අවතැන් වූ පවුල් සංඛ්යාව පදනම් කරගනිමින් සිදුකළ මූලික ඇගයීම්වලට අනුව මෙම දත්ත නිකුත් කර ඇති අතර, දරුණු බෝම්බ ප්රහාර සහ ගොඩබිම් සටන් පවතින ප්රදේශවලින් ජනතාව ආරක්ෂිත ස්ථාන කරා පලා යමින් සිටිති. විශේෂයෙන්ම ආහාර, පිරිසිදු පානීය ජලය සහ වෛද්ය පහසුකම් නොමැති වීම නිසා මෙම අවතැන් වූ පිරිස් දැඩි දුෂ්කරතාවට පත්ව සිටින බව UNHCR නිවේදනය වැඩිදුරටත් පෙන්වා දෙයි.
මෙම තත්ත්වය හමුවේ ඉරානය තුළ මානුෂීය අවශ්යතා සීඝ්රයෙන් ඉහළ යමින් පවතින අතර, සහන සේවා සැපයීම සඳහා ජාත්යන්තර ප්රජාවගේ හදිසි මැදිහත්වීම අවශ්ය බව එක්සත් ජාතීන්ගේ සංවිධානය අවධාරණය කරයි. යුද්ධය හේතුවෙන් නිවාස සහ පොදු දේපළ විශාල වශයෙන් විනාශ වී ඇති බැවින්, අවතැන් වූ පිරිස්වලට ස්ථිර රැකවරණයක් ලබා දීම ඉදිරි කාලයේදී විශාල අභියෝගයක් වනු ඇතැයි සහන සේවකයෝ මත පළ කරති.
