ලෝක වෙළඳපොළේ බොරතෙල් බැරලයක මිල අමෙරිකානු ඩොලර් 200 දක්වා ඉහළ යා හැකි බවට ඉරානය ගෝලීය ප්රජාවට අනතුරු අඟවා තිබේ. ඉරාන හමුදා විසින් බදාදා (11) දිනයේදී පර්සියානු ගල්ෆ් කලාපයේ යාත්රා කරමින් තිබූ වෙළඳ නාවික නෞකා කිහිපයකට ප්රහාර එල්ල කිරීමත් සමඟ මෙම තත්ත්වය උද්ගත වී ඇත. 1970 දශකයෙන් පසු ලෝකය මුහුණ දෙන දරුණුතම තෙල් අර්බුදය සමනය කිරීම සඳහා සිය උපායමාර්ගික තෙල් සංචිත නිදහස් කරන ලෙස ජාත්යන්තර බලශක්ති ඒජන්සිය (IEA) රටවලට නිර්දේශ කර තිබේ.
අමෙරිකාව සහ ඊශ්රායලය එක්ව ආරම්භ කළ ගුවන් ප්රහාර හමුවේ ඉරාන නාවික සහ ගුවන් බලය සම්පූර්ණයෙන්ම පාහේ විනාශ කර ඇති බව ජනාධිපති ඩොනල්ඩ් ට්රම්ප් ප්රකාශ කළද, ඉරානය තවදුරටත් ප්රතිප්රහාර එල්ල කරමින් සිටී. හෝමූස් සමුද්ර සන්ධිය (Strait of Hormuz) හරහා සිදුවන නාවික ගමනාගමනයට බාධා එල්ල වී ඇති අතර, ඉරානය විසින් එහි බෝම්බ ඇටවීම හේතුවෙන් ආරක්ෂිතව යාත්රා කිරීමට නොහැකි තත්ත්වයක් පවතී. මේ හේතුවෙන් ලෝක තෙල් සැපයුමෙන් පහෙන් එකක් ගමන් කරන මෙම කලාපය දැඩි අවදානමකට ලක්ව ඇත.
පවතින තත්ත්වය හමුවේ අමෙරිකානු ජනාධිපතිවරයා සිය උපායමාර්ගික සංචිතවලින් ඩීසල් සහ පෙට්රල් ලීටර් මිලියන ගණනක් වෙළඳපොළට මුදාහැරීමට අනුමැතිය ලබා දී ඇත. කෙසේ වෙතත්, ඉරාන හමුදා ප්රකාශක එබ්රහම් සොල්ෆකාරි (Ebrahim Zolfaqari) අවධාරණය කළේ කලාපීය ආරක්ෂාව අස්ථාවර කිරීමේ ප්රතිඵලයක් ලෙස ඉන්ධන මිල තවදුරටත් ඉහළ යනු ඇති බවයි. බදාදා දිනයේදී පමණක් තායිලන්ත, ජපන් සහ මාර්ෂල් දූපත්වලට අයත් නෞකා තුනක් ප්රහාරයට ලක්ව ඇති අතර, යුද්ධය ආරම්භ වූ දින සිට මේ දක්වා විනාශ වූ වෙළඳ නෞකා සංඛ්යාව 14 දක්වා ඉහළ ගොස් තිබේ.
